新一代福士 Caddy 面世

第四代嘅福士 Caddy Maxi Facelift 車型推出至今已經有五年,一至深得中小企使用做客貨兩用車,亦有重型運輸公司選擇用嚟做領航車或者工程車。自 2017 年起更加被政府垂青,購入成為警察部車隊嘅成員。嚟到 2020 年,福士終於推出全新一代 Caddy,新車基於車廠嘅 MQB 平台開發,喺外觀設計上同第八代Golf 一樣,使用全新設計語彙嘅家族面譜,令外觀更富時代感。

雖然上一代嘅 Caddy 都已經好時髦,但新一代就一改以往圓潤嘅設計風格,外型變得更加銳利。鬼面罩運用打橫嘅線條,令入風口同燈組融為一體。而泵把嘅大面積網形設計更加係第四代 Caddy 嘅特色!

車輛嘅側面比上代車型有比較明顯嘅變化,不過腰線同側滑門仍然採用四平八穩嘅設計,令人仲記得佢係一部裝得人之餘,仲可以裝到貨嘅客貨車身份。車尾嘅造形就比較方正,不過重新設計嘅尾燈組唔單只辨識度高,而且LED發光燈帶設計令燈組毫無商用車味道。最特別係福士嘅圓形車章首次改放喺尾玻璃嘅水撥上面,相信會係往後同廠嘅設計方向。

至於車內部份,新一代 Caddy 可以話有顛覆性嘅改變!新車採用類似第八代 Golf 嘅表板設計,全液晶表板加上大尺寸中控台顯示屏,科技感可以話比上一代提升咗唔少。而車廂佈局可以選用兩座、五座,同七座等多種設置,同時由於採用高頂設計,車內空間一啲都唔焗束。

講到動力,上一代香港版本嘅 2.0 公升柴油Turbo 引擎仍然會提供,馬力達到120匹。另外廠方都提供 1.5 公升汽油 Turbo 引擎、1.6 公升柴油 Turbo 引擎,以及一款 2.0 公升天然氣引擎。波箱方面比較驚喜,因為喺傳統 6 前速手動波箱之外,車主仲可以選擇 7 前速 DSG 雙離合器自動波箱,比上代 6 前速 DSG 波箱仲多咗一個波段。而部分車型更配備 4MOTION 四驅系統。

不過喺香港市場上,因為落後、條文具針對性嘅法例,7座柴油版應該唔會出現。雖然兩座同五座喺香港要用客貨車身份出牌,會有十五年嘅大限,但小編對新一代嘅 Caddy 依然抱有期望!希望喺新車到港之後可以有機會同大家去試一試車啦!

Be the first to comment

Leave a Reply

Your email address will not be published.


*