Volkswagen ID.Buzz 三月上市

YouTube 影片連結︰https://youtu.be/_Z6-ZqtufCE

Volkswagen(福士)嘅 iD. 電動車系雖然仲未引入嚟香港,整個車系目前主要响歐洲、北美同中國銷售,而且成績都唔錯。涵蓋嘅車種包括小型掀背嘅 iD.3 同三個不同體積嘅SUV,好似 iD.4、iD.5,同埋 iD.6。而車系亦準備擴展到 MPV 同客貨車範疇。

Volkswagen(福士)iD.Buzz 概念車

呢款純電動嘅 MPV 命名為 iD.Buzz,早喺 2017 年北美國際車展上首次展出。經過五年嘅設計同準備,未來感十足嘅量產版本,預計將會喺下個月正式發佈。除咗德國,同埋整個歐盟地區之外,相信美國都將會係首批上市嘅目標市場。

ID.Buzz 測試車

喺過往幾個月,ID.Buzz 嘅測試車相繼喺歐洲俾人野生捕獲,並且喺 VW iD Talk 論壇上面,流出多張完整嘅量產版車廂相片。雖然喺相片中見到儀表板俾黑布覆蓋左大半部份,但係都睇到量產版嘅內籠設計佈局同概念車有唔少嘅變動,例如方形嘅軚盤、放置喺軚盤中間嘅顯示燈,同埋中控台嘅大型屏幕,通通 都Bye bye。量產版本嘅軚盤、數碼錶板,同埋中控台嘅多媒體系統螢幕,就沿用 iD. 車系同出一轍嘅佈置。

iD.Buzz 概念車儀錶板及中控台

而作為一部劃時代設計嘅電動 MPV,量產版 iD.Buzz 內籠有白、黑、灰、橙四色配搭。白色嘅軑盤特別搶眼,座位同門板就用上橙白混色嘅布料同配上菱形縫線,中排門邊嘅防水物料踏板同樣有菱形凸紋,同座位互相呼應。而油門(電門🤡)同迫力踏板亦都跟隨 iD 車系嘅概念設計,有 Play ▶️同 Pause ⏸標誌喺上面。

諜照拍到 iD.Buzz 測試車儀錶板及中控台

雖然ID.Buzz概念車嘅內籠設計係走簡約風格,但係嚟到量產版本就變得傳統實用;又雖然被捕獲嘅測試車未見安裝有第三排座椅,但係又見到第二排可以作 6:4 式傾倒,與及可以將座椅完全放平,然之後响車尾安裝層板,使到整個地台完全平坦,用嚟運載貨物,又或者要嚟收藏「車中泊」 Car Camping 嘅物資用品等,都可以令車內空間更有效地利用。

諜照拍到 iD.Buzz 測試車中排及加設層板後之平地台

至於概念車設定嘅 268 匹後驅,同369 匹四驅版本會唔會成為最終嘅動力組合,暫時仲未揭盅。但五座/七座嘅乘用版iD.Buzz,同三座/五座嘅客貨版 iD.Buzz Cargo 相信都會相繼推出。至於會唔會因應市場而推出較長載貨空間嘅長陣版本,當然係未知之數啦!但係作為一部既向老祖宗 Type 2 致敬,同時又要做到跨時代設計嘅電動 MPV,iD.Buzz 都可以話福士車廠嘅誠意之作!

iD.Buzz 測試車

相片來源︰Volkswagen、Carscoops、Autoevolution

Be the first to comment

Leave a Reply

Your email address will not be published.


*