話說喺2020年2月介紹過，全球三大消防車同消防設備生產商之一嘅羅臣鮑亞集團，自2011年已經諗緊整一款「零現場排放」嘅消防車，以回應多國消防人員對救援現場車輛廢氣排放嘅關注，並且喺2016年以「概念消防車（Concept Fire Truck (CFT)）」之名開展研發計劃。
隨著世界各地有幾個城市嘅消防部門開始訂購呢一款「概念消防車」，羅臣鮑亞集團當然亦要開始準備投產工作，而今次羅臣鮑亞集團嘅其中一個合作夥伴，就係具有多年生產重型車輛經驗嘅瑞典富豪集團旗下引擎生產商Volvo Penta。
根據富豪集團喺2020年7月1號發表嘅新聞公報，Volvo Penta同羅臣鮑亞集團會共同研發一套適合於量產型「概念消防車」嘅電能動力傳動系統，合作生產嘅「概念消防車」會取名「革命性科技（Revolutionary Technology，簡稱RT）」（改名嘅嘢 =_= ）。
今次走出傳統商用車概念去研發一套全新嘅電動貨車動力傳動技術，兩間公司嘅共同目標就係改革消防車輛結構，同時令消防車大幅減低噪音以及可以接近「現場零排放」。兩間公司深信用上咗新嘅電能動力傳動系統，可以改善消防車設計，帶來絕佳嘅人體工學、更多功能同提升安全水平――佢哋深信可以引以為傲嘅改變就係用較細嘅體積卻提升到籌載量從而令車輛使用上更靈活。
佢哋依家將RT進行緊密集式測試，並且深信可以好快達到下一個里程碑：喺2020年下半年交畀德國 柏林、荷蘭 阿姆斯特丹、阿拉伯聯合酋長國 杜拜呢3個地方嘅消防部門進行實戰測試。
Volvo Penta認為，以佢哋同羅臣鮑亞集團多年共同合作嘅經驗，佢哋將會帶領電能動力傳動系統嘅發展，以至消防車輛嘅變革計劃――尤其係多年嚟嘅緊密合作關係令佢哋更加明白到用家嘅需要，而由用家作出實戰測試將會係共同達至成功嘅重要一環。
佢哋同時認為RT將能夠回應到現時全球大趨勢當中嘅人口學同都市化對消防工作嘅新需求：消防員需要能夠迅即起步、行得快、可以急煞、靈活自如嘅消防車――所以除咗一套全新嘅電能動力傳動系統，RT仲會有附帶獨立懸掛嘅液壓氣動避震底盤，以提升駕駛時嘅安全系數。
Volvo Penta提及用上新嘅電能動力傳動系統，可以令消防車更安全同埋更多功能，並且可以為全球各消防部門減低燃料支出。
佢哋設計嘅RT，電動摩打安裝喺車軸上面以驅動車輛行走，而且車上面嘅電能儲存系統，絕對足夠消防人員趕赴現場以及喺現場作出拯救行動。就算行動時間長到用晒電能儲存系統嘅儲備，整架消防車所需嘅電能靠一副遠較時消防車使用緊為細嘅油渣引擎就足以提供。
羅臣鮑亞集團就表示，今次研發嘅RT將會係較傳統動力技術嘅消防車更安全、更有效益，並且更符合國際間對「環境可持續發展」嘅訴求。Volvo Penta作為羅臣鮑亞集團多年嚟嘅合作夥伴，清楚明白到實際需要，並且係呢個範疇嘅專家，今次合作將會為消防界帶嚟一款革命性進取設計嘅車輛。（佢哋嘅設計概念有咩特別，可以睇返本台2020年2月介紹嘅文章）
大家又諗一諗：自詡「亞洲國際都會」嘅香港，幾時嘗試去引入一啲新科技、新意念設計嘅消防車，提升消防工作嘅效率呢？
Be the first to comment