日本日野 (Hino) 响今年四月發表電動輕型貨車計劃，並發佈以 Dutro 輕型貨車 (香港型號「300」) 為藍本概念車，初步預計於明年下半年正式發售。事隔大約半年，「黑貓宅急便」嘅公司 雅瑪多企業 聯同日野貨車宣佈兩部樣版車作日常營運之用及測試，地點分別响東京都日野市及琦玉縣狹山市，為期六個月至明年五月底。
呢款日野 Dutro Z EV 電動貨車嘅體積為長4.7m，闊1.7m，高2.3m，從長度及濶度推斷，為 Dutro 系列最小型嘅規格；總重3.5噸。配備功率50kW輸出嘅恆久磁電動摩打，電池儲電量40kWh，預計續航距離約130km。
呢款貨車最大特色除咗係電動之外，仲有五個方面：
1. 選用最細小規格為藍本，適應日本嘅狹窄街道及「一般駕駛執照」(即相當於香港嘅1,2號牌)
2. 駕駛室低床設計 (其實只係換上薄身輪呔)
3. 貨廂低床設計，地台離地面高度僅約400mm (呢個堅係低)
4. 駕駛室貨廂貫通 (Walk-through)，司機/跟車可直接從駕駛室進入「貨斗」，無需落車再上車
5. 行駛低噪音 (電動車就當然㗎啦)
另外配備多項主動安全設備，例如緊急剎車，越線警示等等。
日野汽車表示，希望透過「宅急便」嘅實際營運所得到嘅數據為 Dutro Z EV 作出改良及落實量產型號嘅規格，與及該公司擬定2050年達至「碳中和」目標。至於 雅瑪多企業 則指出是次試用為落實公司响今年年初公佈嘅 Yamato Next 1000 發展計劃關於環保及降低碳排放嘅目標。
呢款車會否响香港出現嘅可能性應該係 0。續航力只有約100km 與及充電設施規劃當然係因素，運輸業界嫌細 and 2.3m 高「入唔到停車場」亦當然係因素，最最最最最最最最主要原因係 Walk-through 設計，運輸署必定拎住37年未郁過嘅 Cap. 374A 法例，尤其是「尚方寶劍」嘅第5 (1) 條斬立決。
其實 Walk-through 設計响日本與及歐洲一直容許存在。响日本例如 Tamiya 曾推出過1/24模型嘅 Toyota Hiace “Quick-Delviery”
响歐洲方面，平治 Sprinter 或 福士 Caddy 呢一類「客貨車」，雖然歐盟議會修改規則必需有隔貨板或隔貨網，但亦容許「拆半網」、 Walk-through，或調節移動。
Photo source: Peugeot official website
日本同歐洲容許 Walk-through 嘅原因就係方便司機同跟車減少在上落貨時爬上爬落嘅次數，例如「宅急便」呢一類派送服務，更可以縮減停車時間。但香港運輸署就成日話「總之危險」「啲貨一冧會責親乘客」……
唔詳細「討論」運輸署的 ONL799，日本、歐洲用咗幾十年都無事發生就係事實。所以，就算幾想用呢部車嚟搵食，都只能夠睇吓就算。
Be the first to comment