早個星期，平治（Mercedes Benz）喺香港推出咗電動客貨車－eVito，意向售價港幣 $60 萬。減咗新能源運輸基金 50% 車價資助後，車價最低大約只係 $30 萬，最如成功申請到都可以話相當吸引。有朋友喺 Facebook 留言區就即刻問有無私家車版，前後都無一個月，代理似乎聽到大家嘅需求，
代理引入嘅係 EQV300 型號，分別有長陣（Long）同埋加長陣（Extra Long）兩個選擇。喺機械方面，採用放置喺車底嘅 90kWh 電池，使用110kW 快充可以一個鐘佈充滿 80%。摩打輸出馬力同扭力分別達 240 匹同 366 Nm，以 WLTP 標準嘅續航距離有 378 公里⋯⋯𠵱𠵱𠵱？啲數字熟口熟面嘅？係呀，因為機械規格上真係同之前客貨車版嘅 eVito 相同㗎！
EQV 作為一部電動家庭 MPV，當然同貨客車版有更豪華嘅設備啦！先喺外觀上，車尾上掀式車門嘅設計，以及同 17 吋輪圈都突顯乘私家車嘅身份。而車身顏色上面，亦會有四種淨色，同七款金屬色，一共十一個選擇。而車廂入面，中排採用獨立豪華座椅，而第三排嘅座椅亦可作多種編排，方便唔同乘座需要。
除咗車廂佈局豪華之外，原廠提供多媒體系統 MBUX 亦係另一個重點。配合 EQ 電動車系更新嘅 MBUX 系統透過中控台上面嘅 10 吋高解像屏幕上，除咗可以顯示充電量、能量流同埋耗電量之外，亦可以喺屏幕上操作導航系統同唔同嘅駕駛模式。而「Hey Mercedes」語音系統就可以支援唔同嘅資訊娛樂 ，控制車廂冷氣、氣氛燈組等等，相信揸過近代平治房車嘅朋友都唔會陌生。
安全設備方面，主動煞車輔助同車道保持輔助都係標準配置，車主亦可以選配數碼車廂倒後鏡、泊車套裝連360°鏡頭，同埋DISTRONIC 主動式車距輔助系統。而 EQV 喺政府「一換一」計劃下，車價就由 $100 萬起。喺嚟緊星期四（2022年4月14日）起嘅復活節假期，EQV 會先喺柴灣嘅平治港島品牌中心優先展出，有興趣不妨去睇下丫～
Be the first to comment