提起警察，可能好多香港人近年都會「嗤之以鼻」，不如大家首先睇返「曾幾何時」公關公司幫香港警務處拍攝嘅招聘廣告，緬懷一下當年盡責為民嘅警察形象：
廣告終歸係廣告，現實世界入面警察只係人，好多人都認為乜嘢無畏無懼萬死不辭嗰啲就真係「留返睇戲嗰陣先講」。
呢個世界係咪真係無警察會冒險犯難履行職責呢？
當地時間2022年3月10號清晨，美國加州就有人報案，話喺10號州際公路西行線遇到有司機高速揸車逆線向東行。
作為州警嘅加利福尼亞州公路巡邏隊（California Highway Patrol）立即調派巡邏車趕去現場，其中1架有2名警員嘅巡邏車採取咗蛇行「滾動式路障」（rolling roadblock）戰術，拖慢公路上嘅車流，清空路面去處理嗰架高速逆線而行嘅車。
無幾耐之後，佢哋就見到嗰架高速逆線而行嘅車，但雙方距離迅速拉近，2名警員就面對決擇瞬間：
- 如果放置道釘路障（spike strip）拮穿對方嘅車呔——要停低、落車、開車尾箱、拎出嚟、開盒、放落地——佢哋無咁多時間可以用；
- 如果用平日嘅追逐干預技巧（pursuit intervention technique），喺側邊擦撞令對方架車打轉——就怕對方架車失去控制會撞到巡邏車後面嘅車龍。
始終嗰度係美國，車輛安全標準點都唔會好似非洲咁差，2名警員面對千鈞一髮嘅時刻，當機立斷決定：
直接用自己揸緊嘅巡邏車兜頭撞停對方！
結果2名警員咁樣揸車撞埋去又真係直接撞停咗嗰架高速逆線而行嘅車，不過正如上面啲相片咁，巡邏車車頭嚴重損毀！
即係咁講，話晒係美國用公帑買嘅巡邏車，梗係買返美國自己人嘅產品，車型係福特特別為執法部門生產嘅FPIU（Ford Police Interceptor Utility），由福特「探險家」（Ford Explorer）運動型多用途車（sport utility vehicle / SUV）衍生出嚟。
根據美國高速公路安全保險協會（IIHS）嘅撞擊測試數據，以時速64公里將車頭司機位一邊40%闊度錯位撞埋固定嘅可變形消力障礙物，模擬撞上另一架車，結果福特「探險家」係表現「良好」。
而福特特別為執法部門生產嘅FPIU就當然唔係淨係得一般「市販車」嘅安全設計，車頭仲裝有「牛欄」（bullbar / push bumper），所以FPIU面對撞擊就點都唔會好似中国長城汽車啲出品咁「猶如紙紮」；加上今次相撞係用足車頭100%闊度去抵消衝擊，巡邏車保護到2名警員喺咁樣撞完車都只係「輕傷」。
加利福尼亞州公路巡邏隊喺佢哋嘅推特發文，指呢次2名警員有心咁揸架巡邏車撞埋去逆線而行嘅車，成功阻攔咗對方嘅動能而避免咗造成無辜死傷。當有少數「鍵盤戰士」指責2名警員「拎納稅人啲錢去玩碰碰車」，更多嘅網民就表揚2名警員果斷行動保護其他無辜嘅人，並稱讚佢哋係「英雄」。
加利福尼亞州公路巡邏隊無主動發放對方架車嘅相片，回應當地傳媒查詢時話對方架車都車頭嚴重損毀，而根據當地電視台影片所見就係咁：
反觀香港，大家仲記唔記得之前香港警察為咗喺公路截停另一架車嗰陣係反而先截停一般市民嘅車嚟做路障？
嗱，香港警察呢~
Be the first to comment