運輸局終於提出修訂《道路交通條例》

政府最近宣佈咗一系列《道路交通條例》及《定額罰款（刑事訴訟）條例》嘅修訂，目標係提升道路安全同促進新汽車科技嘅應用。呢啲修訂將會喺下星期三提交立法會進行審議，喺現今完善選舉制度之後嘅立法會，相信通過機率都好大，政府今次修例嘅目標係確保道路使用者嘅安全，同時推動科技嘅進一步發展。

運輸及物流局嘅發言人表示，呢次修例涵蓋咗多項重要措施。例如，電動車將需要安裝車輛聲響警報系統，喺一定速度以下發出聲響，以提醒行人注意電動車嘅接近。由於電動車行駛時比傳統燃油車安靜得多，呢項措施可以有效減少行人因未能及時察覺電動車而發生嘅意外。此外，修訂規例仲允許駕駛者因應科技嘅進步，離開車輛在目視情況下使用遙控泊車功能，咁駕駛者可以更方便同精準咁泊車，特別係喺舊區狹窄嘅停車位中。

另一項重要嘅修訂係放寬車內視象顯示器喺車輛停泊時嘅使用限制。呢意味著駕駛者可以喺停車時獲取更多有用嘅資訊，例如倒車影像同車輛周圍（即俗稱AVM 360°環視影像系統及更先進嘅虛擬3D環視影像系統）嘅即時畫面，呢項修訂將有助於提高駕駛嘅安全性同便利性。除此之外，修例仲將允許使用攝像機監控系統（電子睹後鏡）嚟取代傳統嘅反射鏡，呢唔單止可以提升車輛嘅美觀性，仲能有效降低風阻，減少能源消耗以期達至環保效果，同時攝像式後視器提供更廣泛同清晰嘅視野，進一步增強駕駛者嘅安全保障。

至於已經十分普及同應用多年嘅LED車外燈光系統亦正式納入法例當中，今次修例涵蓋嘅範圍十分廣泛，亦可免除沿用多年嘅做法（即根據 香港法例第374A章第4條藉由運輸署署長行駛豁免的權力批出許可），減少在車輛類型評定 Type Approval 時所產生不必要嘅爭拗同行政程序。

政府發言人強調，會繼續審視科技發展同車輛操作需求，適時更新相關規例，以確保同國際標準保持同步，靈活配合汽車行業嘅發展需求。呢啲修訂唔單止能提升駕駛安全，仲能為市民提供更高效同智能嘅出行體驗。

總結嚟講，今次《道路交通條例》嘅修訂顯示咗政府對道路安全同科技創新嘅重視。透過呢啲措施，政府希望能夠為市民提供一個更安全、更高效嘅交通環境，同時促進新汽車科技喺香港嘅應用同發展。