話說，香港嘅車主 (尤其是私家車車主) 有一個「十萬公里大限」嘅觀念，之前我已經寫過一篇文章指出呢種觀念是何等荒謬無稽；早陣子又有响 HK Car Channel 嘅 Facebook 貼出台灣一個以汽車為題材嘅電視節目嘅畫面
以之相比香港嘅車主真係「小學雞都不如」！
用「10萬大限」去講商用車其實唔係好恰當，但以香港嘅私家車車主對商用車嘅無知，例如好似下面張圖，响街口泊車導致貨車巴士轉彎受阻只會破口大罵「轉彎霸兩條線正仆街」
其實都睇到有需要從呢個角度為基礎去講嘅；再者，咁先至有大啲機會「呃LIKE」吖嘛！
400萬公里係乜嘢一回事？環繞地球105次囉。就咁睇呢個講法都覺得誇張。實際啲，以一部中重型貨車、拖頭响香港每日行駛大約400公里，即係架車起碼用咗36年。撇除「15年車齡上限」呢條擺明利益輸送嘅法例，對於普遍地只會用數字衡量一部車嘅狀態、認為過咗某個年限就要劏咗架車嘅香港人嚟講，一定破口大罵式質問車主「你係咪傻㗎」。又就算以歐洲對貨車司機職業安全嘅法規為基礎計算每日行駛上限 (連埋法規「勉強容許」的 buffer 里程) 900公里，車齡起碼13年。
Scania 日前發出新聞稿，一部2007年出廠响中国浙江省溫州市登記嘅 Scania P380 拖頭，行駛咗超過420萬公里，且未有「大修」紀錄。
Photos by Scania (Hong Kong) Ltd.
即係咁….. 撇除所有「政治因素」…… 中国嘅道路、空氣質素、維修技術水平都比歐洲低，係不爭嘅事實。响歐洲，一部同類型拖頭，通常行駛咗大約200-250萬公里，縱使未必劏車，但必定要做「揭盤頭」(拆開引擎氣缸頂蓋、油底兜做檢查)，甚至「抬車頭」── 拆散整副引擎，更換「遮、呤、司、邊」(氣缸套、活塞連相關配件)。响中国可以行到逾400萬公里，平心而論已經係有少少奇蹟。要是新聞稿提及這部 Scania P380 拖頭未曾做過「大修」(我嘅理解即係未做過「抬車頭」) 係堅的話，Scania 嘅耐用程度都真係唔嘢少！
「聯盟網站」 HK Bus Channel 之前製作過一連兩集測試一款 Scania 旅遊巴士嘅節目，我响入面有講到 Scania 係一個無驚喜嘅牌子，但總能予駕駛者信心。事實上，不論响駕駛操控或是維修保養，Scania 旅遊巴士响業界嘅口碑可謂「無得輸」；至於貨運業界方面，Scania 响1980年代中期進軍香港，當時香港嘅中重型貨車市場可謂「日本車天下」因而完全不被看好。
仍記得N+N年前一位貨運業老行尊同我講過，佢聲稱係第一批 Scania 拖頭買家。佢仲提及當年代理送個車頂擾流板 (類似下面張相盒模型咁上下啦)，好多車主都唔要，但佢就要咗。
好多同業恥笑佢「裝埋啲無謂嘢、多鬼餘、多個香爐多隻鬼…..」，但之後核對過油站單據，行家們終於對「風阻系數」呢四個字恍然大悟，然後就「狗衝」地跟風。連日本品牌原廠根本無呢樣東西，就去物色本地玻璃纖纖工場，為其未需要劏嘅日本品牌拖頭、噸車加裝呢個原本認為「法國大餐」嘅東西。
今時今日，一街都係 Scania 中重型貨車同拖頭，算係車廠同代理用時間去累積返嚟嘅成果。420萬公里，可謂一個佐證。有啲嘢，認真嗰句，好唔好、得唔得，唔係靠「吹」嘅。
講返420萬公里，好老實，咪數錶得6個位….. 大家明我想講乜啦。但是從以往我睇過嘅歐洲商用車資訊，都認為係「堅料」嘅可能性幾大 (至少我噏得出200萬左右「揭盤頭」)。或者，重溫一宗唔係幾開心嘅新聞 ── 2016年6月21日牛頭角淘大工業村四級大火。
焚燒歷時108小時才被救熄。有市民發現响現場主力撲救嘅鋼梯車同泵車响救火期間引擎一直運轉，未有見到消防處安排過換車。嗰兩部車，正正就是 Scania。
根據消防處公開發佈的資料，消防泵車嘅水泵係由主引擎帶動。理論算術：108小時 = 行駛逾8600公里。即係環繞「新界環迴公路」 120次。
唔想提呢單新聞㗎，但以普遍香港人乜都要快靚正即食嘅心態，我未能搵到其他適合又能夠一講就明嘅例子。你知啦，香港地唔搵夠例子佐證，加上「無朵無牌頭」好易會被老屈「賣花讚花香」㗎嘛。
單純420萬公里呢個數字，算有一啲新聞價值㗎喇。用嚟相比「10萬大限」…… 大家應該終於明晒寫嚟做乜啦。但正經啲講，呢個故仔亦證明保養維修嘅重要性，一架車嘅「壽命」並唔係一般見識的所認為的。
Be the first to comment