响2012年英之傑集團取得福特 (Ford) 嘅代理權，期間嘅業績縱然未能重現「夏巴」响上世紀70-90年代叱咤香港車壇嘅風光，總算打破再之前好一段時期嘅沉寂。唔知係咪所謂「親生仔 vs 過繼仔」嘅道理，加埋香港客觀地無可否認真實地存在嘅「慣性收視」嘅市場情況，代理權易手係遲早嘅事。
英之傑集團旗下的「世譽汽車」响舊年年尾宣佈與福特嘅代理合約期滿後未有續約，並明言所有售後服務將在後日 (2020-6-30) 終止；但又未見有關於新代理商消息，搞到好多 Escort, Focus, Kuga, Mustang…….. 嘅車主唔知點算，「搵食車」Transit 客貨Van、Transit Connect 的士嘅車主/司機直情人心惶惶，「不如劏咗佢買過部」嘅聲音此起彼落。
直到今年4月中旬，市場消息指萬事得 (Mazda) 代理商宏益集團與福特達成協議擔任 Ford 於香港及澳門新代理，但現有車輛嘅售後服務及車廠保用 (Warranty) 遲遲未有具體公佈，車主們嘅擔憂仍未釋除。
宏益集團日前正式宣佈旗下「宏鋒汽車」(Venture Motors) 由7月2日起正式接手福特於香港及澳門嘅代理業務，並在葵涌永業街設立維修中心，總算讓一眾福特嘅車主們起碼知道唔會「唔駛整」(點解要加引號？唔好要講咁白啦)。
「宏鋒」除咗已經公佈保養服務嘅基本資訊之外，並開設「網上車主登記」網頁，祈與所有福特嘅車主取得聯繫。
唔好以為新代理嘅目的只係「促銷」，要明白要做返好售後服務嘅其中一個先決條件，係要有一個完整嘅車輛資料庫，先至可以响零件供應、服務規劃管理等方面做更好準備。不論前任代理商嘅 Database 如何處置，「宏鋒」直接與車主們取得聯繫的確係最好嘅方法，亦見到「宏鋒」對現有嘅福特車主是有誠意的。
有關其他詳情，可聯絡福特香港代理 宏鋒汽車有限公司 維修服務中心：
地址：葵涌永業街 14-20號華榮工業大廈地下
電話：(852)3768-4898
營業時間：星期一至五 08:00 – 19:30；星期六 08:00 – 18:00；星期日及公眾假期休息
Be the first to comment