新一代 Fairlady Z 概念車發佈

日產Fairlady 370Z推出已經11年喇，雖然仍然深得JDM車迷愛戴，但係按照6年一轉款嘅慣常節奏，370Z畢竟都開始步入「高齡」，日產Z系列跑車都需要更新迭代，所以9月16號日產就喺日產橫濱博物館發佈咗全新Z Proto嘅原型車。

雖然喺發佈會上展示嘅只原型車，但按外型同功能嚟睇，都已經非常接近量產。所以預計喺2021年推出嘅全新日產Z系跑車，好大機會都會同Z Proto設計相似。

從外觀上來睇，Z Proto同370Z外型設計相似。修長嘅引擎蓋同貼近後轆沙板嘅車門，都係秉承初代Fairlady 240Z風格。車頭設計簡約，車頭燈組件採用內部上下分體式設計，展現出初代Z系列車型大燈嘅輪廓線，而長方形嘅中網就採用圓角點綴。

Z Proto長4382毫米，闊1850毫米，高1310毫米，尺寸上大致同370Z相若。輪胎繼續使用前255/40R19，後285/35R19嘅「前窄後闊」配搭，更配合跑車嘅身份。而左右裙腳、頭唇、後擾流，以及後懸掛都採用咗大量碳纖維材料以達至更輕量化。

從後面嘅視角嚟睇，車尾嘅田字型尾燈就最為突出。心水清嘅你應該一眼就睇得出佢係向第四代嘅 Fairlady 300ZX致敬。為咗同頭燈作出呼應，尾燈設計上都採用咗方形燈條設計，將舊元素融合喺新設計上。

車廂入面都貫徹簡約設計，中控台依然係熟悉嘅T字型佈局，儀表板由過往嘅行針式改為12.3吋全液晶顯示屏，而中控台亦都按現代化汽車標準加入可以控制音響同導航嘅大屏幕。軑盤就改用全新設計，當然亦都附有多功能按扭，方便駕駛者喺駕駛時，雙手唔需要離開軑盤都可以控制到唔同嘅設置。

作為一部性能跑車嘅原型車，Z Proto嘅中控台上面亦都設有顯示Turbo壓力、Turbo轉速，同埋電壓嘅三聯表。

Z Proto沿用前置後驅佈局，搭載V6雙渦輪增壓引擎，最大馬力可達400匹，據說經Nismo加持後嘅版本更加可達487匹。六前速手動波箱以及機械手制設計，喺現今嘅跑車市場上已經極為少見，但毫無疑問的確比附有加減波嘅自動波箱同電子手制更加提升可玩性同極限，亦都更有潛質成為下一代漂移利器。不過按市場需要，除咗手波之外，應該都會推出自動波箱版本。