馬路真係如虎口 過路千祈咪亂走

本台2020年7月16號中午，經突發事故群組收到一段影片，可以見到一宗行人被重型貨車撞到嘅事發過程。

片段長約半分鐘，可以見到事發地點係堅尼地城卑路乍街近士美菲路。

起初馬路上嘅車停咗喺度，相信係等緊爹核士街嘅交通燈號「轉燈」，有車輛停喺行人過路線嘅位置，有途人就「如常」過馬路。

當車龍開始郁嘅時候，咁啱有人沿行人過路線一架重型貨車前面行過馬路，重型貨車郁車就將嗰個人撞倒，幸好嗰個人跌喺車軸近中間位置，重型貨車未有「轆過」佢，後方客貨車司機亦幸好見到傷者瞓咗喺馬路，及時停低。

今次情況，撇開究竟當時過路線燈號係乜，就講物理學問題，以中型或重型貨車為例，由於車身較高，存有三大盲點位：

• 正常成年人嘅身高，如果靠近車頭2米內，司機根本無法直接察覺；
• 如果途人企喺左邊車頭，會被左邊A柱遮蓋；
• 由於右邊A柱接近司機，覆蓋視線範圍較大，司機右轉時有可能一時間見不到途人過路。

今次車禍，相信同上述第1點有莫大關係，香港警務處交通總部道路安全課總督察鄭梓人喺2020年6月就曾向傳媒指，應該提醒途人――尤其長者――千祈唔好貪圖方便亂過馬路，特別係避免喺司機盲點出現。

雖然話按照最新國際標準，重型車輛出廠時已經裝咗好幾塊鏡，減少司機視角嘅盲點位，鄭總督察好直接咁話，安全守則其中一項就係過路前要同司機有眼神接觸，「如果你見唔到司機，咁司機都幾乎唔會望到你」。