上個月小弟又「返鄉下」 ── 馬來西亞 砂朥越 古晉 (Kuching)。即係邊度？相信香港 (或台灣)的讀者都 No idea。但唔緊要啦，講車之嘛，係咪?!
曾經係東南亞面積第四大國家(僅次於菲律賓、印尼、泰國) 嘅砂朥越，於1963年成為馬來西亞聯邦一員之後至今，首都古晉的市貌仍然保留1970年代的狀態，唔止係建築物，仲有滿街都係逾30年車齡的「陳年老古董」。有啲狀態「溶溶爛爛」，甚至殘到要爆seed「咁都仲可以行?!!」，亦有一啲車主做咗復修。
古晉所見嘅「古董車」款式型號並非「86」、「哨牙仔」、「Ben士寶馬」之類「名車」，反而係香港人普遍認為「普通料」嘅家庭房車之類，例如「100仔」Corolla，甚至仲有E60、E70、E80…… 「大皇冠」Crown (S110) 都有！
除了豐田以外…….，仲有日產 Sunny B310、B11，香港俗稱「賊船」嘅三菱Lancer(A172)、Galant (A120/A130)、Pajero (L040)，大發Charade、萬事得323(BD系) 都有……私家車之外仲有客貨VAN，豐田 LiteAce(M30)、Ford Econovan，日產C22 就有少少「出千」，因為日本响1994年停產但馬來西亞廠房一直生產至2010年。你諗得到以至諗唔到嘅車款，都隨時擦身而過。鍾意睇「古董車」的話，絕對可以滿足你嘅眼光同渴望。
大家或許想話兩地社會環境、驗車制度、經濟狀況唔同不能相題並論；响香港，要「養」古董車花費唔少金錢同心機，確係現實。但仲有國家城市仲係一街「錢七」多少證明「無零件」不過是順口開河之話。無可否認，賣車相比維修確實係 Easy money，衍生出「買過架好過整」、「車齡高咪數高就應當劏咗佢買過架」一類嘅思維，加埋「身份象徵」觀念，可會是香港馬路上普遍係車齡十年八載嘅新款車，就算「古董車」嘅款式寥寥可數，我就不加評論了。
─────────────────────
去古晉旅遊有乜好去處？古城一個囉！即係有乜睇？接受到香港無直航機，最方便搭 Air Asia 經吉隆坡轉機而總行程時間接近10小時先至再問我吧！
Be the first to comment