2022年10月8號下晝3點幾鐘，如果大家搭車落開旺角，應該會親身經歷咗一次好嚴重嘅塞車事件——究竟發生咗乜嘢事呢？

其中一個重要嘅原因，就係3點鬆啲嗰陣，喺亞皆老街去到彌敦道路口，發生咗一宗車輛碰撞事故。如果大家行經現場嘅話，首先都會發現到一架「日産柴油」車頭嘅冷凍櫃貨車揩到一架「萬事得2」。

不過就咁睇落

未至於搞到亞皆老街四條線全部停低晒啩？

實情係咁，大家行去後少少嘅位置睇下，原來係冷凍櫃貨車後面又有一架「豐田金丰」的士揩到一架「豐田Spade」——前後加埋就咁啱將四條線都各有啲位置頂住咗喇！

至於講返四架車嘅損毀情況，其實真係唔嚴重㗎！碰撞之中亦都無人受傷…只不過據其中一名車主所講，佢打咗電話畀保險公司徵詢意見之後，相關保險公司嘅代理人就同佢講：

「報警先，等警察嚟到先至好郁車」

如是者大家就打電話報案，然後就乖乖地喺現場度等警察到場啦！

但係大家都明白，亞皆老街都算係旺角區——以至成個西九龍——其中一條重要幹道，咁樣四條線都被車頂住咗，梗係好大件事啦！

週末大家都出晒街玩嘅時候，咁塞車令後面嘅車上面不論司機、乘客都怨聲載道。

現場最左線有一架九巴67X號路線雙層巴士，啱啱埋完「亞皆老街 旺角站」巴士站之後，原本佢要沿住亞皆老街切入右邊行車線，去到彌敦道路口右轉，但偏偏因為遇上呢次碰撞事故，巴士被困喺最左邊「只准左轉」嘅行車線上面。

九巴嘅車長作為一個遵守法紀嘅司機，當然唔會貿貿然喺呢一條「只准左轉」嘅行車線上面右轉㗎喇！

如是者就更加「頂死」咗後面其他車，完全無「走棧位」，塞喺佢右後方嘅新巴701A號路線巴士嘅車長，都走落地去同九巴車長講「你揸走架車啦！」

當然九巴車長亦有佢嘅道理：

「未有警察同埋稽查嘅指示，我點敢喺條左轉線上面右轉呀？」

擰轉個頭去睇最右線，的士碰撞之後伸咗個車頭過去最右線上面，搞到後面有一架想揳入嚟嘅「日野」貨車「唔夠位過」，貨車司機嬲到即刻落車「炒蝦拆蟹」，連原本想勸交嘅路人都被佢鬧埋一份。

事件一路拖到去4點幾鐘，第一名交通警察終於揸住電單車「趕到」現場喇！隨後佢都好快手咁影相再同幾位司機錄取咗簡單嘅口供——聞說就係有人亂咁切線——之後要求佢哋盡快將幾架車揸去前面先至泊埋一邊再處理。

至於嗰架九巴67X號路線雙層巴士，亦都喺警員同稽查嘅協助之下，成功喺「只准左轉」嘅行車線上面「右轉」入彌敦道，繼續車程。

不過最關鍵嘅問題就係：

警察咁耐先至到嘅？

（有無睇表？）

嗱，做人最緊要公道！

原來當時附近地方有多宗召喚個案，其中包括喺彌敦道旺角道交界，有一架新巴793號路線雙層巴士喺轉彎嗰陣，勾爛咗一架「死揳爛揳」的士嘅左邊車身。

另一邊廂，喺彌敦道575號，當局又接到報案話發生火警。

唔知係咪真係「咁啱得咁橋」，咁多報案加上所引致嘅堵塞而令到交通警員咁遲先至到現場處理今次意外喇！