近十年行73萬公里，「鑽的」換新車

當初因為照顧家人外出經驗而成立嘅「鑽的」，今年踏入 12 週年。自 2013 年購入全港第一部輪椅的士－豐田 NOAH Welcab 後，由早、夜更同替更司機 24 小時不停為有需要乘客服務。接近十年過去，行車里數已達 730,000 公里，並且已屆換車之時。

鑽的車主伍尚敦、資深司機譚耀權及行政總裁梁淑儀與「上一代」鑽的 SE1671 合照

但因種種原因，再次引入 NOAH Welcab 可謂困難重重。但經過三年嘅努力，今日全新嘅 NOAH Welcab 終於交付「鑽的」，並喺代理九龍灣陳列室舉行簡單典禮。

運輸及房屋局局長陳帆、運輸署署長羅淑佩及運輸署助理署長黃志光與「新一代」鑽的 SE1671 合照

全新「鑽的」豐田 NOAH Welcab 輪椅的士，採用編號 R80 嘅第三代 Facelift 車型，配用2.0 公升 Valvematic電油引擎同 CVT 波箱，可以產生 150 匹馬力。原有七座位設計，因遷就香港的士法例減為五座位，提供最多1+4（1張輪椅，4名同行者）或 2+2 （2張輪椅，2名同行者）載客量。而同普通私家車版本 NOAH 嘅最大分別，就係車尾門打開後，可以透過按鈕，輕鬆將車身地台降低，同伸出自動金屬斜板，方便司機使用輔助索帶將輪椅乘客由車尾推入車廂。