smart 呢個微型車生產商，自 2019 年被中国汽車龍頭之一嘅吉利汽車集團，以50%股權同平治母公司Daimler 合資重組成立 smart Automobile Co., Ltd. 後，近日正式發佈品牌以「#」元素為名嘅新一代純電動車家族首款作品。全新車系稱為 smart #1，今年將會喺中国在內嘅市場上市。
全新smart # 家族採用「感性·靈銳」為設計理念，車身輪廓以柔和圓潤為主。smart #1 嘅外形上一改以往fortwo 同 forfour 嘅線條，但筆者反而覺得某啲角度睇落反而似MINI Countryman⋯⋯🤡
smart #1 車頭採用三角形 LED 圓角燈組，左右兩邊由日行燈帶貫穿，著燈之後會呈現 X 形燈光，離遠都有好高辦識度。而泵把下方就保留咗梯形入氣口，為電池、制動提供散熱氣流。
除咗車頭嘅入風口外，車身兩邊就使用隱藏式門把手、同粗黑色輪拱連接嘅車底導風裙腳，都符合空氣流體學，對電動車續航有好大幫助。而隱藏式門把手內亦提供照明同破冰功能，當感應車主攜帶車匙行近時，除咗會著燈外，仲會將覆蓋手柄嘅薄冰推開。車頂採用懸浮式設計，並且備有巨型玻璃天幕。而車尾亦前後呼應地「X形」尾燈，相信呢個「X頭X尾」嘅計設將會成為全新一代 smart 車型嘅特色。
4270mm 長，1822mm 闊，1636mm 高嘅車身尺寸，同同級對手 MINI Countryman 相若。但同以往「大碼」四座位嘅 smart forfour 比較就真係大咗兩個碼！
車廂內左右對稱式嘅中控台，設計相當簡潔。司機位前面嘅 9.2 吋長條形液晶顯示屏為司機提供駕駛資訊，而中間嘅 12.8 吋懸浮式觸控屏幕就提供更詳盡嘅訊息同設定。音響更加配備 Beats 嘅十三聲道喇叭，同功放模組，車內娛樂享受可以話更上一層樓。車廂空間方面，當然比過往 smart forfour 更寬敞。後排座椅可以作 6/4 式傾倒，令尾廂容積由 323 升增加到 986 升咁多～
smart #1 採用後置永磁同步摩打驅動尾軸，最大功率 200kW、峰值扭力343Nm。0-100km/h 加速大約 6.7 秒。車底嘅三元鋰電池組容量有 66kWh，以中国 CLTC（中国轻型汽车行驶工况）標準，最大續航距離有 560公里。喺 7.2kW慢充模式下，需要 7.5 小時充至 80% 電量，而 150kW 快充就只需 30 分鐘就可以充滿 80%。而 smart Pilot 智能輔助駕駛系統亦當然可以選配，包括ACC自動適應巡航、LKA 車道保持輔助、BSD 盲區監測系統、TJA 交通慢行輔助、APA 自動泊車輔助、同自動控制燈光等。
全新一代 smart 電動車由平治（Mercedes Benz）全球設計部門負責設計，吉利全球研發中心做工程研發。好唔好睇，就見人見智啦！至於耐唔耐用？Time will tell～🥸
Be the first to comment