【英國綜合報導】英格蘭西北部蘭開夏郡 (Lancashire)、距離 Leyland 汽車發源地只有五英里嘅普萊斯頓 (Preston) 喺上星期六 11月2日(英國時間) 舉行咗一場規模龐大嘅汽車拍賣會。
呢個拍賣係由一間位於當卡士打 (Doncaster) 嘅拍賣行舉辦。事源係响普萊斯頓有一個農場物業連穀物倉需要出售作重建用途，而响個穀倉外面停放咗 135輛中古及古老名車被閒置，原有業主無打算全數運走。
拍賣分別以網上及現場競投舉行，拍賣行表明 Sold as seen，即係所有車輛以現況售出，唔保證行得、撻得著車，更當然唔會提供保養，一切零件、維修費用，與及所有風險及責任由買方自行承擔。
呢批「廢鐵」嘅車款最少有接近三十年歷史，有個別更逾 3/4世紀；品牌型號除咗廣為一般香港人熟識的之外，亦有不少其經典絕版程度，莫講「千禧世代」的讀者朋友唔識，就連筆者以至編輯部的可能年近半百的「廢老」都未必記得，甚至未聽過。
例如 NSU (下左圖)，即係後來被福士收購後成為今日嘅奧迪。又例如 Triumph，唔好以為只係女裝內衣先有呢個牌子啦…… 香港譯名「凱旋牌」 Triumph TR7 (下右圖) 曾經係嘅經典「溝女車」 。
全場最舊的車款，係一部 1923年出廠嘅 福特 (Ford) T-Bucket Hot Rod。
另外還有於電影《哈利波特》出現過嘅 Ford Anglia (下圖) ，
與及首頭兩代福特葛天娜 (Ford Cortina) 都在拍賣之列。
葛天娜係福特第一款於英國廠房生產嘅車系，由1963年起一直到1982年停產，之後就由可能大家較有印象嘅 Sierra車系入替。
拍賣名單入面亦有日本品牌，包括一部 1986年出廠的 豐田 司力架 (Toyota Celica)，與及一部 1979年出廠的 日產 (Nissan) Fairlady 280ZX。
另外尚有不少 kit-car，例如以兩組 Mini Cooper 車架組合而成「孖尾擔 6×2 前驅」的 Hustler 6。
但最吸引到我嘅並唔係呢啲古靈精怪車種，而係一眾 English Brand，例如 Austin、 Morris、Daimler、Rover、Jaguar 等等，事關响1970年代嘅香港，日本車還未盛行而周街都係英國車，除咗依家仍然容易見到嘅 Mini Copper，仲有當年廣為教車師傅採用的「味拿仔」Morris Minor。仲有唔少「一把年紀」嘅車迷仍然有深刻印象嘅「磨地雞」── 有在今次拍賣之列的 Morris 1300。
因為採用「水壓式避震」，經常漏水導致「冧避震」而車身下降，是故之有「磨地雞」匿稱。
除咗「冧避震」，日本車在1970年代中後期大舉進軍香港，英國車嘅質素及可靠程度有得對比之下，逐漸失去市場優勢。差成點？依稀記得當年有車房師傅名句「唔漏油嗰部就唔係英國車」。也許加上戴卓爾夫人上台展開嘅工廠合併及私有化政策，生產同出口量大幅度減少，至了1980年代中期，除咗巴士同貴價的 Rolls Royce、Daimler、Jaguar，已鮮有英國車入口香港。
講返呢次拍賣，買家買得心頭好當然高興，但亦可以話係「惡夢」嘅開始，因為唔少車款早已停產 (甚至車廠已執笠)，難以購買零件以作維修，或可能花費龐大請工匠特別訂造，值得與否真係見仁見智；甚至乎大部份拍賣嘅車輛嘅現況其實已經「爛身爛世」，但仍然成功售出，因為買家將之用作「器官移植」於同款汽車。
還有更大的麻煩就係即使成功復修都未必能重新出牌行駛，因為拍賣行表明不保證能提供有如香港嘅「牌簿」嘅車輛登記文件，運輸牌照局(DVLA)會將該車視為「身世不明」，除非車主將車輛交予 DVLA 進行相當於香港俗稱「大驗」、Type Approval 檢驗及極度繁複手續，才能完成登記出牌手續。
所謂千金難買心頭好，又係嗰句「值唔值，人人不同諗法」啦，不過，英國相對香港地大物博，車主或維修師傅真係「有地方」有時間進行翻新維修。而且英國有較多元化的二手中古、古董車交易渠道，修復好之後轉售可能有點利潤，都不失為一條財路。
Photo credit: Daily Mail, The Hagerty Group,LLC, NCM Auctions & Asset Management
Be the first to comment