的士車保被取消，人心惶惶無車搭

話說今早本台收到各大的士群組傳出消息，承保本港約6成的士車保業務的泰加保險，因武漢肺炎持續導致環球經濟下滑等一系列不明朗因素下，向其所有承保之的士車主發出通知書「根據保單合約條款，行駛其取消保單之權利（7天通知期）」，因此所有車主、打理人及司機均人心惶惶，深怕七天之內無法尋找到合適的保險公司對其「生財(尋租)工具」作出法律要求之所謂保障而要全面停駛，屆時香港將會出現的士荒！

因商用車保險與一般汽車保險不同之處係並不是所有有承辦汽車保險之公司均願意承保商用車之保險，主因風險評估比私家車複雜得多且索償案數量高得多，而泰加保險「計得掂數」因此成為的士車保之龍頭企業，故此這次退保事件勢將影響本港市民出行之便利。

根據香港法例第374章《道路交通條例》，只要保險失效車輛就不能行駛，若強行行駛則司機會面臨被檢控，而且乘客、路人、其他車輛的保障亦受牽連。猶幸於撰文前收到最新消息，的士車行車主協會已短時間內尋得香港保險業監管局之協助，有4間保險公司認頭承保的士保單，暫時而言算是有驚無險。

又話說每次的士行業有乜頭暈身慶，業界中人都會嘈到拆天。而近年的叫囂，每每都將茅頭指向 UBER 累事云云，今次亦都唔例外。但保險單關 UBER 乜事呢？泰加有做UBER車嘅保單嗎？相反而言，若非咁多年來得一間泰加「包起晒嚟做」，而各位大哥又只係掛住收租同銀行對數睇吓點樣推高牌價，對「一泰獨大」闊佬懶理，試問泰加今次又點可以將各的士大哥一鑊炒起晒？

再又正如好多年前明明日圓匯價下跌，豐田金豐車殼偏偏在日產 CEDRIC 不再輸港之後由19萬升到接近30萬，的士車主們只是為每個供車供多咗因而變相收少咗租，然後又是申請加價填返條數嘛。只不過今次泰加唔係狂加保費而係攬炒式冚檔，正宗租都收唔到，搵唔到發洩對象唯有賴UBER。作為消費者的角度更要問，當年福特 TRANSIT CONNECT 引入香港，皇冠車行焗住減返車殼價，有無話減返錶頭益返我哋嘅升斗小民？

雖然事到如今有中銀、中國太平洋、中國太平同招商永隆意願接手，好似多咗選擇，但正如啲氣站咁，想當年用低價引晒你哋換氣艇，之後先慢慢閹你哋一路加價。嫌貴都無得返轉頭用返油渣車，而且慣晒地板油重迫力，Prius 混能明明耗油成本可以同金豐睇齊但結果貴成倍。如今就留名等睇過多一年半載四間保險公司「合謀定價」，睇到時要唔要學 Uncle Lim 攞本聖經出嚟咁講「先知在家鄉是不受悅納的」。