【日本車壇消息】日產 Nissan iMK 純電動車 EV K-Car

總部及廠房位於中國廣西柳州嘅汽車生產商五菱汽車設計同生產嘅小型純電動車五菱宏光MINI EV，純電動、四座位嘅迷你車型設計，除咗比燃油汽車低嘅駕駛成本之餘，亦符合中國大陸近年推行嘅二孩家庭政策，因此喺多個城市熱賣。果然切合五菱汽車嘅口號「人民需要什麼，五菱就做什麼」！

可惜呢款咁有中国當特色嘅小型電動汽車只有左軑版本，加上喺中国國內都供不應求，作為中國人在「亲、不包郵」認為係「海外地區」嘅香港，當然就無緣一試啦！

而講到小型汽車文化，日本為咗適應日本交通規例而衍生嘅「軽自動車」K Car就更加不可不提。但係以K Car 尺寸推出嘅電動車至今仍然唔多，要做到好似強國嘅五菱宏光MINI EV 咁車仔細細又塞得落四個成年人嘅電動乘用車就更加喺 i-Miev 之後未見再有第二款喇～

喺過去嘅9月7號，日產就聯同三菱發佈一款針對日本 K Car 市場嘅四座箱式電動乘用車－iMK。意味日本 K-Car 亦都準備加入轉型電動化。

iMk 由NMKV Co., Ltd. 負責設計同開發。NMKV Co., Ltd.係一家由日產同三菱持股嘅合資企業，雙方各持50%股份。旗下已經發售嘅產品包括日產 Dayz、三菱 eK 等等。

講返 iMk 嘅機械性能，廠方就未有詳細交代馬力、扭力等資料，但係就特別有介紹 iMK 採用 20 kWh 嘅電池供電，而且電池備有雙向充電功能，喺緊急情況下可以輸出電力為家庭電器供電，猶如一個大型NAS電源。

新車量產版本預計將喺 2022 年初推出，屆時將會加入車廠最先進技術，包括駕駛輔助等功能。車價暫定喺 ¥2,000,000 左右，折算大約 HK$140,000 。話平就一定唔及五菱宏光 Mini EV 只係 人民幣 50,000 就買到，價錢仲係冠絕日本本土所有 K Car！但又咁講，話晒係大廠出品，最少唔怕出現某愛国老人咁講「中国的會爆炸」丫嘛！唔知到時香港會唔會有得賣咯。