編輯部中人早前就响 FB 某個車主 group 見到一個咁嘅 Post
查實我哋都唔係第一次見或聽到類似嘅問題，亦真心覺得呢類問題好無知。事關响外國，唔好話歐洲或北美周街都係「過十萬公里」嘅私家車而車齡隨時唔夠三年；即使近到响台灣，100,000 km 根本等閒事。唔通當地嘅車主腦部健康有問題?!
再講吖，編輯部中人同一些友好嘅愛駒嘅「咪數」隨時唔止100,000 km，廿幾萬都有，難道我哋係傻瓜？
香港嘅二手車市況有一個現象，以「牌簿手數」(車輛登記文件上的前任車主數目) 與及「咪數」(咪錶記錄出廠後總行駛里程) 做衡量判斷車輛質素嘅 first criteria，認為呢兩項數字越細代表質素越好。
汽車行內認為越多「前任」越難掌握車輛的使用情況，以至有無改裝而影響車輛狀況，故此認為「牌簿手數」越細越好。我個人就覺得其實意義不大。真係要知架車嘅狀態質素，「上架任驗」就一目了然。
即使對汽車認識不深嘅一般人，都明白「咪數」確實同車輛狀況有關連，但其實無必然關係，事關如果一如我哋有句口頭禪 ── 非洲式用車，幾好嘅車都唔會好質素。
唔少網民 (包括 巴士台 HK Bus Channel 的) 一直都有問「非洲式用車」嘅典故由來，今次順便簡單講解一下。
响非洲，零件供應同維修服務都比較落後，車主亦普遍缺乏汽車知識，因而通常少做保養檢查，直到有故障才去維修；但若果「病情嚴重」難以維修或費用高昂，就將之報廢拆毁，然後買過另一部。簡單講，「非洲式用車」即係「平時唔做保養，壞咗先去整」，同埋「修理費太貴不如劏咗佢買過部」呢句嘢，係咪好耳熟能詳呢！
講多個笑話俾大家聽，我同有做過汽車維修嘅編輯部中人曾遇過唔少完全無「換油 check車」概念嘅車主，更當然唔知火咀、風隔為何物。點樣遇上？架車行到窒吓窒吓焗住入車房，放出嚟嘅偈油、波箱油唔止黑過墨汁，直情杰過泥漿；風隔黑過礦工塊臉 …… 當然仲有其他位置嘅損耗以至損壞啦。問車主一句「知唔知要換油」而佢真係答「唔知」，甚至有一個車主回答「以為去油站入油就行得㗎啦」。 亦所以呢，唔好覺得我哋以「非洲式用車」取笑香港車主係好無謂、好過份囉。
另一方面，唔計呢幾個月嘅社會狀況，香港嘅公共交通服務算是方便，私家車算不上必須品。唔少人買私家車嘅目的撇除炫耀，都不過是「方便週末車屋企人出去行街食飯」，「咪數」自然低；即使揸車返工，每日行駛里程也不超過 100 km，一年的行駛里程頂多30,000 km。再另外的，唔少人買車都會「上會」(向銀行或財務公司做租購借貸)，通常還款年期三至四年，到「供甩咗」嘅時候嘅「咪數」大約100,000 km。
唔知係咪咁嘅原因，就有「十萬公里夠鐘拎去劏」嘅講法流傳。又唔知係咪呢個所謂「十萬大限」，就有唔少想買二手車嘅人真係覺得「過十萬咪嘅就唔好買」。
查實一部私家車機械部份金屬組件，例如引擎氣缸內嘅活塞、缸套，波箱內嘅齒輪 嘅 life cycle 起碼 30 萬公里，即使出現損耗，只要有零件可供更換就可以進行維修，然後又可以繼續行下一個唔知幾多十萬。加埋文章開首提到 100,000 km 响外國根本視作等閒，可想而知「十萬大限」之說都幾 ……
不過，要真係行到「咁高咪」嘅大前題係必須定期做保養檢查，換偈油、波箱油、水箱水等等 。只不過香港有幾多私家車車主有「定期保養檢查」嘅概念？就算有，又有幾多車主唔係等到幾乎行唔到甚至「電腦鎖車」先至死死氣去車房？或者就係「非洲式用車」先至可以成就到「十萬大限」 嘅「真理」。
外國嘅二手車買家著重嘅係賣方能否提供詳細嘅保養維修記錄，而唔係單憑「咪數」下定論。或者香港太習慣只會以數字做唯一準則去衡量事物，因為「眼見為實」唔駛解釋咁多囉。
3 Trackbacks / Pingbacks