UBER 香港七宗罪之「第七宗罪」一切禍源，由抽盲盒開始

如果話第一宗罪到第六宗罪，闡釋 Uber 响香港將司機五花大綁、再戴上金鋼箍然後強塞隻死貓入去個口，嚟到第七宗罪，真係要講清楚呢一切禍源，由抽盲盒開始。

一講到「抽盲盒」，好多做乘客嘅實係一句劈埋嚟：「唔抽盲盒，俾司機揀客？揀客正仆街！」唔該，爆Seed之前，睇返第三、四、五、六宗罪所講嘅，衍生出嚟司機所受嘅有邊樣唔係因「抽盲盒」而致？淨係第六宗罪明明 set 咗去屯門結果去咗粉嶺、set 咗去沙田結果去咗何文田都夠啦！

若要堅持抽盲盒係天經地義，先睇一個好簡單嘅問題：

就當你唔係憨鳩仔
但香港地總會大量有人做憨鳩嘢

即係點？
例如灣仔修頓中心去旺角朗豪坊
明明搭港鐵必定快過坐 Uber 或的士….

再甚至乎星光行去中環摩天輪，
簡直係憨鳩單中之XO啦！

堅持「抽盲盒」吖嘛，即係認為司機陪個憨鳩客一齊憨鳩係天公地道？點解唔去諗，如果司機可以「做個可以揀客嘅仆街」，少咗一個「陪憨鳩客一齊憨鳩嘅司機」，就多返一個正常叫車有可以快咗有車嘅機會呢？

或者做乘客嘅你即刻諗到第三宗罪衍生嘅「加錢先至有車」嘅問題。咁就先後退一步講，明知幾乎無的士吉車過嚟，於是成日撳 Uber 然後叫幾飛。如果無得「抽盲盒」而有排等，又唔願的士 Call台或者「飛的」加貼士，無「仆街司機」接你張單，依然係司機嘅問題？引伸出嚟，乘客同司機一齊「願者上釣」有乜問題？再相反角度去問，當你叫幾飛而的士到先然後取消Uber嘅預約，搞到司機輸油錢電錢，點解唔覺得自己嘅「揀車搭」係杏加橙呢?! 唔係話乘客叫車加錢係應份，而係現實就有呢啲成本，爭在邊個去承擔。若因此認定Uber嘅「抽盲盒」令你有機會連 $5 電召費都慳係合理，皆因你就係一個仆街冚家鏟嘅自私精。

而响歐洲，法例訂明網約車平台必須保障司機合理權益，遇上呢啲司機半路中途個客取消，就要補償返俾司機。單係英國就要補返最少 £4.0，視乎區域、距離、車種。亦因此睇到 Uber 响香港就將呢啲應該承擔嘅風險同責任卸晒俾司機。

或是就如第四宗罪咁，如果有車喺連翔道碌緊，或者喺富多來、埃華街附近，可以快啲接到你，但Uber 偏偏抽盲盒派架响「三號仔」飛緊去葵涌嘅車，唔覺得蝕章嘅係自己?! 响龍鼓灘嘅嗰位乘客，唔係真係等個司機响港珠澳兜返嚟呀嘛?!

另外，嗰班好鍾意影住啲裝外掛偷睇目的地、仲爭幾步都唔埋嚟嘅司機，上 Threads、Facebook 出 post 屌鳩司機「揀客正仆街」，司機偷睇目的地，或打電話問個客去邊，固之然係問題，但個問題源頭就係 Uber 抽盲盒，點解唔屌鳩 Uber毛澤東上身「煽動階級鬥爭」？

另一方面，就算司機跑到白金級，有所謂「半盲盒」或有謂「天眼」又如何呢？响大角咀「11分鐘，東南」，你以為尖沙咀或者黃埔，結果係上環；或是响觀塘「35分鐘，西」，你以為機場「發達咯」，點知係「揸 Alphard 都焗住要開埋X，仲要唔知等幾耐」嘅屯門，唔係真係滿足於 1月、4 月、7 月、10 月最尾嗰日夠800分，就覺得自己高人一等？講到底，連白金甚至鑽石級都中伏，咁就更加證明，Uber 要你抽盲盒係一切問題嘅根本禍源。

相對如果唔駛抽盲盒，乘客唔駛見到架車喺面前都唔駛埋嚟，唔駛聽司機打電話嚟問去邊然後收線；司機唔駛開咗「愛回家」都唔知會去咗邊；唔駛接啲明知個客叫幾飛、自己就焗住燒油用電去搏可能中途取消又只能谷鳩氣嘅單；唔駛 Mission Impossible 完再食 AR -1 / CR +1；連分級、評分、乜鬼申訴無門，都根本唔需要玩到今時今日咁仆街。所以話，一切禍源，由抽盲盒開始，唔係無的放矢！

根本上 Uber 响香港嘅運作情況，放諸返去歐洲、美國，根本就係(涉嫌)違法所為。歐盟 GDPR 第5、13、15、22條嘅核心原則就係公平、透明、資訊對等，並嚴禁黑箱作業，必須有真人處理投訴、申訴。而「抽盲盒」或是白金級以上嘅「半盲盒」，接單率、取消率都唔符合GDPR。「愛回家」嘅例子，更是相當於美國FTC 嘅誤導，以至近乎刑事級數嘅欺詐所為。

乘客想去邊，點解司機唔可以想去邊？當打工嘅你屌鳩無良老細要無償 OT，甚至要24/7/365嘅時候，點解要做無良乘客認定司機開咗「愛回家」結果被跣到謝過謝拉特都係應該？呢種只會向下欺壓，拎司機嚟發洩，充份證明香港就係一個奴隸社會。

第一至七宗罪，請睇清楚，全部都只係闡釋 Uber响香港經營嘅問題。仲想 spin「的士狗屌鳩 Uber」以至「收咗的士業界錢」嘅癲佬/婆請睇清楚，就算的士瓜晒，呢啲問題 Uber 唔處理，都依然係問題。但如果 Uber 得逞做咗 market leader，甚至假設政府真係發 30000 個牌，Uber 呢啲玩法持續的話，請諗清楚，全香港市民都係輸家。

根本網約車合法化嘅問題，唔係發幾多個牌，養唔養住周國強嗰堆炒牌；要管嘅唔止係司機，更關鍵係管束好啲平台，唔好返咗去 16 世紀殖民時期虐待奴隸嗰種玩法。

警告：嚴禁政治上腦「幫滴滴、高德，或者任何中資平台抬轎」，或者認為收咗周國強、伍海山、鄭敏怡……嘅錢。本網站所有主理人員自出娘胎以來未有從事過的士行業