新一代豐田混能房車Prius喺今日日本時間13:30正式發佈。全新Prius已經嚟到車系第五代車型，新車由豐田歐洲設計部門主理，以「Hybrid Reborn」為概念，使用第二代TNGA底盤平台，除咗令車身剛度增強之外，亦都可以增加車廂內嘅空間。
新一代Prius外型睇落更具跑格，因為車身高度比之前幾代更加低矮之餘，軸距亦都加長咗50mm，而鈴圈亦特意加大到19吋。車尾採用左右連貫性尾燈，以及隱藏式後排乘客門把手，加上由前門車底一向後輪拱伸延嘅線條，睇落真係非常吸引。車廂內部一如其他豐田房車車系採用T字型島式中控台設計，大形液晶顯示屏當然唔少得，但係喺軚盤前面亦都有一個小型屏幕，為司機提供基本行車資訊。而原本擺放喺中控台嘅波棍，亦都改放喺前座兩張座椅中間，令車廂豪華感提升。電池擺放位置亦由後排座椅後面改到去座墊下方，除咗可以更善用空間之外，亦都可以降低重心，增加行車時嘅穩定性。中控台部份亦加入氣氛燈，燈光可以隨Toyota Safety Sense警報發出唔同閃光，咁司機就唔需要再喺淘寶自己買氣氛燈返嚟加裝啦！
最「基本」嘅 2.0 汽油混能版本（HEV）提供最高193匹馬力，而插電混能版本（PHEV）就最高達223匹馬力。廠方喺記者會上公佈0-100Km/h只需6秒，而純電里程（EV Mode）亦比舊款多出50%，插電混能版本更提供車頂太陽能光伏板作為追加裝備，以增加續航距離。
至於發售日期同埋價錢等等詳細資料，官方暫時仲未有公布。但係唔知到時引入香港嘅版本，又會少咗啲乜嘢規格同配置呢？
Be the first to comment