再見，無牌車手－伊莉沙伯二世

可能係歷史上首位無駕駛執照而能夠合法駕駛汽車嘅女士－英女皇伊莉沙伯二世陛下，喺英國時間2022年9月8日下晝安詳辭世，終年96歲。  

點解話女皇陛下係無駕駛執照又合法揸車呢？因為英國自1903年訂立《1903年汽車法》（Motor Car Act 1903），設立「駕駛執照」制度後，由當地於1904年引入第一部現代化汽車開始，駕駛者就需要持有免試駕駛執照先可以合法駕駛。喺1935年開始雖然加入駕駛考試，但去到1939年因為第二次世界大戰爆發而暫停咗考試制度。

大戰期間，當時正值18歲嘅伊莉沙伯公主加入英軍後勤部隊服役五個月，喺軍隊入面學習駕駛同汽車維修技能，但即使學識咗揸車，公主殿下當時一直都無取得駕駛執照。  到1952年伊莉沙伯公主繼承英皇喬治六世即位女皇後，因為英國駕駛執照係由君主簽發，所以喺法例上女皇唔會簽發駕駛執照俾自己，因此陛下就相信成為史上第一個無駕駛執照而能夠合法駕駛汽車嘅女士。

唔好以為女皇陛下好似討論區啲鍵盤戰士咁，無牌就唔識揸車喎！正如前文所講，女皇喺登基前喺軍隊入面負責駕駛後勤救護車之外，仲學識埋整車，而喺即位後，女皇陛下都多次自行駕車外出，甚至充當司機，車埋菲臘親王、查理斯王子、安娜公主、安德烈王子，同愛德華王子一家六口出街㖭！歷年嚟女皇陛下自駕外出嘅英姿仲多次俾人影到～

不過去到2019年頭初，當時97歲嘅菲臘親王揸車發生交通意外後，皇室醫療團隊就建議女皇同親王夫婦二人唔好再自駕外出，自此女皇都一直無再揸車喇。直到舊年11月，女皇陛下再次俾人影到佢以95歲高齡，駕駛佢部British Green嘅積架X-type旅行車帶愛犬出去散步。呢次應該係女皇最後一次坐上駕駛室喇！

如今女皇陛下已經坐上通往天堂嘅快車，喺天國同菲臘親王相聚。願女皇精神長存，天佑英皇。

_{圖片轉載自：Getty Images 及 ABC News截圖}