再有英國皇室座駕售出🇬🇧

近呢兩星期，香港同世界各地嘅汽車傳媒都有唔少篇幅介紹過一部曾經由英國戴安娜王妃擁有過嘅 1985 年款福特 Escort RS Turbo S1。消息指經過拍賣，呢一部 Escort RS 最終喺拍賣會上以 £722,500 賣出。

其實近期喺市場上放售嘅皇室座駕又點止戴妃呢一部呢！英女皇伊莉莎伯二世陛下嘅親妹妹瑪嘉烈公主（Princess Margaret, Countess of Snowdon），無錯，即係香港嘅瑪嘉烈醫院、公主道都以佢命名嗰位公主殿下，佢生前擁有嘅勞斯萊斯 Silver Wraith II，最近都喺網上拍賣，底價 £20,500。其實早喺兩年前，呢一部身份獨特嘅 1980 年款勞斯萊斯 Silver Wraith II 都曾經兩次現身知名古典車拍賣場，但最終都無被人投得，今次改為參與喺蘇格蘭Northampton 嘅私人拍賣會，已經係現任車主第三度求售。

講返部車，有別於另外 2153 部同款車，勞斯萊斯喺 1980年5月，按瑪嘉烈公主殿下嘅需求，特別生產咗呢一部加長軸距版本嘅 Silver Wraith II。車身採用 Two Tone 配色，獨特嘅棗紅色油漆，配上 Everflex 材質嘅黑色車頂。車頂除咗喺擋風玻璃上方裝有一盞藍色嘅警燈之外，警燈後仲有一個預留安插皇室徽章嘅插孔。

車廂入面，一如其他皇室車隊，採用深綠色嘅羔羊毛厚地氈，車身門板就用上黑色嘅 Nuala 牛皮。中控台嘅無縫磨砂玫瑰木紋裝修當然唔少得！而座椅亦根據傳統使用灰綠色（Pale Green，但其實筆者睇相真係見唔到綠色🤡）梳化座墊。值得一提係呢部車嘅後座據講係比普通版本嘅 Silver Wraith II 稍稍升高，以便公主喺坐車出巡時，令車外夾道嘅民眾可以更清楚覲見公主殿下。

1980年代嘅勞斯萊斯，動力組合一定唔會係慳油嘅配搭。最大馬力 300 匹嘅 6.75 公升 V8 引擎，帶動三前速自動波箱驅動後輪，提供如坐飛氈嘅舒適乘坐感，更令公主殿下鍾情於使用呢部 Silver Wraith II 足足22 年直到佢與世長辭。而喺 2002 年公主喺溫莎堡舉行嘅葬禮上，呢部伴隨公主走過 47,359 英里嘅紅黑色 Silver Wraith II 亦都出席默默陪伴主人走最後一程⋯⋯

自 1980 年落地以嚟，瑪嘉烈公主呢部 Silver Wraith II 都得到倫敦勞斯萊斯經銷商嘅資深機械師Chris Lee 負責定期進行維修保養，退役後就輾轉由私人收藏家擁有。今次拍賣除咗公主座駕本身之外，亦都包括公主擁有嘅車牌號碼「3 GXM」，以及公主嘅一啲文書書信同舊相片。最終，呢一部獨特嘅長軸距版本 Silver Wraith II，連同上面講到嘅車牌、書信等，喺 8 月中以 £35,301 叫價一併賣出。