歐盟禁勞斯萊斯車主使用發光女神,理由到底係咩?

英國車廠勞斯萊斯(Rolls-Royce)嘅出品可以用奢華同獨特嚟形容﹗車廠提供俾客人選擇嘅車廂同車身配搭可謂相當之多元化,基本上每一部出廠嘅勞斯萊斯汽車配置都係全球獨一無二。

不過歐盟最近就向勞斯萊斯發出一項禁令,指廠方嘅其中一個選裝項目唔符合新嘅光污染法規,禁止勞斯萊斯繼續提供呢個選配。而呢個被禁嘅配件就係發光嘅磨砂透明「歡慶女神」。

發光「歡慶女神」神首次出現喺2011年嘅120EX電動概念車上。

「歡慶女神」係勞斯萊斯嘅品牌標誌,不少車主為咗令自己嘅愛車更具獨特性,都會要求廠方為「歡慶女神」進行改裝。當廠方喺2011年發表電動概念車120EX時,車頭嘅「歡慶女神」雕像亦都換上發光嘅磨砂透明質地,以特顯新車嘅身份。自此之後,廠方亦都將呢款發光「歡慶女神」(Illuminated Spirit of Ecstasy)加入成為原廠選配套件,適用於車廠旗下全部車系。

勞斯萊斯會負責將客戶嘅「歡慶女神」換返做純銀版本。

隨住歐盟修改有關汽車照明方面嘅法規,勞斯萊斯發光「歡慶女神」因為唔符合新嘅光污染法規,廠方喺早前已經向歐盟嘅各經銷商發出指引,表示發光「歡慶女神」將會由歐盟地區嘅選裝配件清單中刪除。而最近更加為喺歐盟成員國內已落訂嘅訂單,同埋之前已經裝咗上車嘅車主作出退款,並且會負責由廠方換返做原本純銀版本嘅「歡慶女神」雕像。

其實呢個發光「歡慶女神」嘅價錢一啲都唔平,價值 3,500歐元。雖然對尊貴嘅車主而言,呢個可能只係小數目,而且得到廠方全數退款,所以車主可以話係無損失,但係因為一個小小嘅發光「歡慶女神」就話造成光污染,令到愛車無咗獨特性,呢一點車主心入面一定唔好受。

Be the first to comment

Leave a Reply

Your email address will not be published.


*