【駕駛態度】7旬司機走捷徑 3歲女童被撞亡

揸車遇上紅燈要停低有時都會令人覺得唔鍾意,所以總會有啲司機諗辦法避得就避,而「衝紅燈」呢啲擺明犯法嘅行為就始終唔係咁好,所以有啲司機會揀穿過燈位附近嘅處所「走捷徑」嚟避開等燈。

只不過呢~改行呢啲「捷徑」就始終唔係正規行車道路,難免會有啲本身唔會喺行車道路上遇到嘅人、物、事,揸車入去就要更加小心。

當地時間2020年3月14號2130時左右,位於日本大分県宇佐市大字佐野1078-1嘅「焼肉 ウエスト 宇佐店」駐車場就不幸因為有司機為避開紅燈,「走捷徑」而發生車禍。

當時1名71歲阿伯秋吉克広,揸住佢架大發Hijet輕型貨車去釣魚,喺國道10號「中津繞道」路口遇到紅燈,佢原本就諗住左轉,而佢左邊就係食肆嘅停車場,佢就決定揸車穿過停車場「走捷徑」。

阿伯踩住油穿過停車場嗰陣,咁啱有一家人食完晚飯由食肆出嚟、步行返入停車場攞車,輕型貨車旋即撞倒呢家人3歲大嘅女村上心春,救護員到場將細路女送院,可惜都係救唔返。

大分県警察依家正在詳細調查今次車禍嘅實際發生經過係點。

其實香港都有唔少司機會為避開紅燈而揸車穿過街角位嘅加油站之類設施「走捷徑」,有部份職業司機為咗跑快啲仲會嘭嘭聲咁飊過去。嗱,記得快還快,但要更加留意呢啲「捷徑」難免有人行,唔好害到人。

Be the first to comment

Leave a Reply

Your email address will not be published.


*