話說阿 Lim 叔叔喺2019年10月寫過1篇關於香港人「非洲式用車」嘅文章，當中有提及香港有啲車主有個概念認為1架車行咗100,000公里就應該「劏得」。
即係咁講，唔係話外國啲人買二手車唔會睇「咪數」，不過人哋會睇重返車主係咪識得「錫車」、有無認真保養架車呢啲實際嘢多好多——尤其同香港人概念反轉嘅係，外國文化係見到1架有咁上下日子嘅車行得嗰10萬、8萬公里，唔少識車之人係會擰晒頭咁覺得「你買架車返嚟掛上聖誕樹㗎？」
汽車，生產出嚟就係為咗「跑街」嘅，跑得多而引致「咪數」高乃正常現象，所謂「靚車」亦係一樣嘅啫——美國亞利桑拿州嘅Sean Dirks就示範畀大家睇：
高「咪數」都係靚車
Sean擁有1架1992年款嘅極品（Acura，本田旗下嘅豪華汽車牌子）NSX——NSX呢個車名係「New Sportscar X」嘅意思，當年呢款車係本田以意大利跑車名廠法拉利旗下328型號做「假想敵」而研發出嚟，全鋁車身內藏1副3公升V6引擎，274匹馬力推郁只係1,370公斤重嘅車，性能表現連法拉利都嚇一跳，全球車壇對日本汽車生產能力刮目相看！
講返Sean呢架NSX，Sean自己唔係第1手車主，佢係喺2004年由上任車主買入，當時呢架NSX「咪數」係大約7萬英里（大約11萬幾公里）。Sean喺日常生活當中，唔係自己行路就會揸呢架NSX去目的地，嚟到2021年佢為呢架NSX增加咗33萬英里（大約53萬幾公里）「咪數」，睇個里數表已經過咗40萬英里（大約64萬幾公里）——以香港某啲車主嘅諗法：「劏咗6次啦！」。
呢啲超級跑車，坊間都認為佢哋會「好有性格」，成日「扭計」壞呢樣壞嗰樣，踩落個油門可以輕易畀個好高嘅速度，但又同時可以輕易畀個好高嘅維修費數字——而Sean呢架NSX又唔係呢回事，全段時間都只係做足保養就健健康康。
如果話「完全唔使整」就肯定呃人嘅，起碼初代NSX嗰個會影響傳動嘅眾所周知波箱卡環問題，Sean都遇過——不過係喺「咪數」去到123,000英里（近20萬公里）嗰陣先至出現——而作為識車之人，Sean就趁呢個機會順便「升級」自己架NSX，抬咗另一套NSX-R嘅波箱換落去。
除咗呢樣之外，Sean呢架NSX唯一要拆開嚟整嘅嘢，就係「咪數」去到38萬英里（大約60萬公里）嗰陣，因為損耗而換過晒成套懸掛系統——不過佢今次唔玩「升級」，全部只係跟返「市販」規格，佢話咁先至最符合日常駕駛性能同埋可靠度喎！
Sean自己都話好期待呢架NSX陪佢行多10萬英里路，而其實Sean呢架NSX淨係得死氣喉、車轆改動過之外，基本上都係本田原廠車出廠嘅規格，正好引證咗一樣嘢：
適當保養就可以令架車長久保持可靠性能
Be the first to comment