【新車速報】全新第11代本田 Honda Civic Sedan 房車

本田今年四月時喺北美發表咗第11代嘅Civic Hatchback 車型。事隔四個月，亞洲規格嘅新一代Civic Sedan 房車型號亦都喺日前喺泰國市場推出。新一代Civic 屬於大改款車型，亞洲版本分為 EL、EL+ 同埋 RS 三個版本。喺泰國嘅售價由 ฿ 964,900 泰銖起，即係港紙大約 $225,000 左右（未連稅）。而最頂級嘅運動化車型RS版就索價 ฿ 1,199,900 泰銖。

車身尺寸方面，新一代Civic 房車長闊高為4,678 x 1,802 x 1,415mm，軸距則為2,733mm，整體都較舊款有所增長，全新設計嘅內櫳同外觀造型都令人眼前一亮之餘，亦都有幾分同廠車型第十代 Accord 嘅影子。EL 同 EL+ 款原裝配備 16 寸輪圈，而 RS 就配有 17 寸輪圈，外型上雖然同Hatchback 版相似，但較長嘅尾跨，配個修長嘅腰線，都令 Sedan 版視覺上更加蟄伏。加上 RS 版仲配有熏黑倒後鏡殼、黑色門把、尾翼同埋雙出死氣喉，而且原廠仲提供 Modulo 外觀同內櫳升級套件俾車主選擇，令到 Civic 嘅跑味更加濃烈。顏色方面，原廠有晨霧金屬藍、鉑金珍珠白、隕石金屬灰、珍珠黑水晶，同埋月球金屬銀五種基本塗裝，而 RS 版仲可以揀獨有嘅火焰金屬紅特別色彩。

新一代 Civic Sedan 動力同樣搭載 1.5 公升四氣缸 Turbo 引擎，配有 CVT 無段變速波箱，可以提供 178Ps 最大馬力同 24.5kgm 最大扭力。駕駛模式除咗有 Normal 以及可以造出 17.2km/L平均油耗嘅 Econ模式外，RS 車型仲有Sport Mode 選擇，提升操駕樂趣。

內櫳基本設計都同北美 Hatchback 版大致相，中控台嘅 Advanced Touch 觸控屏幕可以話係最大嘅特點。EL 同 EL+ 版本採用七寸屏幕，而 RS 款更加用上九寸屏幕。Advanced Touch 觸控屏幕同時支援月Apple CarPlay 手機無線連結功能。而中控台亦有位置供手機或者其他裝置作無線充電。而車主亦都可以透過手機程式 Honda Connect 同車輛連接，可以作遠端解鎖或者啟動引擎等功能。

作為新世代嘅 Honda 新車，當然唔會漏咗 Honda Sensing 駕駛輔助安全系統。Honda Sensing 整合咗 CMBS 碰撞緩解系統、附 LSF 低速跟車功能嘅 ACC 主動式車距調節、LKAS 車道維持輔助、RDM 道路偏移抑制、LDW車道偏移提示、前車起步提示、AHB高燈自動切換等等⋯⋯另外 HSA 斜路起步輔助、Auto Brake Hold自動停車手掣，同埋離開時自動上鎖功能，都方便車主日常使用。