【日本】轎車攔軌列車撞 幸好現場無人亡

當地時間2021年3月26號凌晨0008時左右，日本JR常磐線1列10卡編成、由品川開去勝田嘅E531型列車，喺茨城縣土浦市JR常磐線土浦站同神立站之間嘅路軌道同1架逃避追捕結果攔喺路軌上面嘅轎車相撞，並且起火。

根據土浦警察署嘅說法，事發地點位於土浦火車站以北約3公里。事發後列車有一部分出軌，轎車同列車頭卡起火燃燒，火勢大約一句鐘後被撲滅。

現場消息指列車上有64名乘客同車務人員，全部無受傷。警方認為，呢架轎車係由路軌旁道衝過圍欄進入路軌，但轎車司機失蹤，警方正在調查轎車司機行踪。

根據JR東日本水戶分公司所講，因為今次車禍，土浦同羽鳥之間嘅特急列車暫停服務。另外，佢哋亦減少咗取手同土浦之間、羽鳥同水戶之間以及水戶同磐城之間列車班次，但無安排巴士替代服務。

喺香港，如果講到一般汽車會同鐵路車輛相交，可能大家都只會諗起電車同輕便鐵路，但又有幾多人記起以前九廣鐵路（英段）都有同道路相交？

又其實相關嘅「平交道」去到今時今刻仍然存在喺港鐵東鐵綫，不過隨著起好咗替代道路，呢啲「平交道」已經陸續失去日常用途，下次有機會不妨留意吓。