話說，上網見到有人喺社交媒體上載咗一幅某社交媒體群組內發文嘅截圖：
嗱，即係咁講，個人意見就係：青蛙公仔呢~kerokeroppi好似又真係可愛過pepe…而上網聲稱「『揼』堆汽油彈入去當炮仗慶祝就啱㗎喇！」又可能涉及干犯《刑事罪行條例》…
又咁講，擺上汽車台就講返汽車先：
相入面嗰款係英國著名嘅越野路華（Land Rover）「衛士」（Defender），可以話係汽車界一大傳奇。
故事始於第二次世界大戰結束之後，英國農業一蹶不振，當時嘅英國路華公司以出產房車而聞名，但係為咗方便農夫工作、推動英國農業戰後重新發展，就需要研發一款耐用兼高性能汽車。佢哋為公司開咗一條分支――越野路華，參考咗美國嘅Jeep，但為咗保持實用同耐用，佢哋以簡單為主咁設計車身，造就出Series I。
自1948年4月30號喺阿姆斯特丹車展推出Series I之後，10年內已經賣出20萬架！Series I嘅成功，1958年就出Series II、1971年出Series III，去到1976年已經生產咗超過100萬架。
1980年代初改款時，分別喺1983年同1984年推出110（One-ten）同90（Ninety），之後喺1990年為咗配合返1989年推出嘅「發現」（Discovery）係有「名」而加叫做「衛士」。
不過隨著國際間提高汽車標準――尤其係歐盟自1990年代中後期開始收緊廢氣排放同撞擊測試――「衛士」過去一直引以為傲嘅設計就顯得跟唔上時代洪流。由Series I到「衛士」，走過68個年頭，喺2016年1月29號呢個系列嘅第2,016,993架成品出廠之後，車廠就宣佈停產。
而香港過去作為英國領土一部份，不論係Series定「衛士」，都曾經係駐港英軍同香港政府部門用車之選――部份仲係一直用到2018年添！
不過，香港揸「衛士」就幾麻煩，因為絕大部份都係用柴油引擎，而由於柴油車必須登記為輕型車，仲受制於「夠15年就要劏車」呢種 6uo 政策。
偏偏「衛士」呢啲車款係可以畀車主玩過世嘅――因為佢唔係行電子，全部行機械式，所以壞嘅機會好細…而就係對玩機械嘢嘅執著，唔少車主都諗盡辦法讓它死而復生：
- 同古董車會申請，睇吓可唔可以申請豁免。
- 送架車返英國廠，睇吓廠方可唔可以將佢改裝成歐盟後期一啲嘅標準。
- 放喺車房，睇吓借唔借到「T牌」去爬山。
玩車背後嘅浪漫，外人未必能夠充份理解，但對香港人嚟講，「衛士」代表嘅，絕對唔止「一代越野名車」咁簡單。
而當好多人以為係「天價貴嘢」嘅平治S系列，其實一架W220批次嘅現價已經跌到一萬港紙，但早過W220出廠嘅汽油版越野路華「衛士」…
係呀~仲值超過49萬㗎！
所以返上去文首講嗰個發文…哈哈哈哈哈！
Be the first to comment