中国香港特区政府將响尖沙咀嘅香港科學館遷移至沙田，所為何事唔方便講啦，但冚世界原以為「搬博物館之嘛」可以唔駛理，更是無人認為同車有關 (包括我哋)，誰不知有車主s 報料，位於文林路嘅「爛地場」嘅經營商日前發出通知「因政府收地，限令12月28日全部清場，餘下3日租金 pro-rata 退返」，場內過百部月租車位嘅私家車、校車旅遊巴、貨車車主依家頭都痕埋。
翻查地政總署網站，呢個停車場係响 2019年4月11日以「短期租約」方式，批出予「金倉有限公司」用作停車場，租約為期1年，期後每季續租；另參考沙田區議會一份2020年嘅資詢文件，呢個停車場合供提供111個私家車、貨車泊位。
為要將文化博物館「變身」，做乜要 K.O. 埋個停車場，客觀上都真係搲頭，但正如廟街阿伯話齋「呢個時勢，心照啦」唔好去考究啦。但係咪要急到咁呢? 通知期得嗰十幾日咋噃！再又即係「心照啦」唔好去質疑點解，不過，從文件及習慣法去研究吓，應該無問題嘅。
雖然唔知道地政總署份租約嘅「終止租用通知期」係幾耐 (依家都好難查，even 引用《公開資料守則》都未必查得到)，但按照「每季續租」之示，理論上應該响明年1月10日先至 end of the quarter 而終止。「金倉」要求車主 12月28日 17:00 前揸走啲車，即係理論上預留十零日時間清場「交吉」，亦都好合理嘅。不過，如果按照「每季續租」嘅講法，下一個 cut-off date 就係 2024年4月10日，對於中国香港特区政府嚟講又可能真係太遲。
好喇，即係可以假定中国香港特区政府真係想急急腳要「搬館」而清走個停車場，得嗰十幾日….. 嗱，唔好質疑合唔合理，純粹以坊間習慣、約定俗成，終止租約通知期，住宅一般起碼一個月，商舖、辦公室通常兩、三個月。即係點？自己練吓「慧根」啦！
不過咁，事到如今都米已成坎，車主們都得另覓他場，私家車就可能「左膠」、「仇車L」嗰種思維俾錢就得啦，但沙田區嘅商用車泊位，不論公家定私家，數目都相當有限，根據區議會份文件就只得166個，據知出租率幾近爆滿，即係呢鋪唔到班「左膠」、「仇車L」大吵大鬧乜春「無錢泊車正仆街」。再又據悉沙田、馬鞍山極少數有剩餘「大車」月租位嘅停車場就乘機坐地起價，其中一個最誇張嘅，由原價 $3600 加逾 50% 至 $5500。
雖然有所謂「自由市場」，但對於涉及嘅貨車、校巴、旅遊巴，相關嘅成本就再延伸到用家層面，奈何承如早前响巴士台嘅文章所講，香港人嘅自私心態睇怕都只會「話之車主死」㗎喇。加上「左膠」、「仇車L」，啲營業車車主呢次真係啞子吃黃蓮。但又客觀地講，停車場、泊車位呢啲社區設施確實係政府嘅責任所在，而睇返中国香港特区政府曾慣常叫喊嘅學習對象 ─ 新加坡，每個組屋區方圓 2km 內必定有足夠予中、重型貨車同旅遊巴士停泊嘅停車場，就算細規模嘅都有如紅磡暢通道南 (行內叫紅磡橋底) ，又難怪李顯龍同「儲君」黃循財佢哋得戚嘅。
表面上係巴膠影相一部順洲車身 (Soon Chow Bodywork) 嘅富豪 B7R 旅遊巴
但請留意側邊同背景，好明顯係一個响新加坡嘅商業車停車場
攝於 20170303 ，地點：直落布蘭卡31街 (Telok Blangah 31 Street) 近 BLK 80A 嘅 Heavy Vehicle Carpark
Be the first to comment