2022年嘅香港動漫電玩節就喺7月29號到8月2號假香港灣仔會議展覽中心舉行，作為全香港最大型嘅同類型項目活動，香港動漫電玩節一直以嚟都吸引到唔少人男女老幼咁樣去參加，會場外面排隊嘅人打晒蛇餅已經係常態。
而正如其他世界各地嘅同類型項目，通常呢類活動都會吸引到唔少人盛裝打扮飾演返動漫入面嘅人物角色——不過無論你想飾演嘅動漫角色喺原本嘅故事入面有幾咁神通廣大、打極都唔死，嚟到現實世界，你都要明白根本唔係你扮咗個角色就會變到一樣嘅。
時間嚟到2022年7月30號黃昏接近5點鐘，話說本台收到有人傳嚟一啲行車記錄儀片段，依家我哋睇咗第一段片先：
片段入面睇到有兩位扮演緊某啲動漫角色嘅朋友仔，就喺港灣道橫越菲林明道，相信熟悉呢一帶嘅道路使用者都會記得，港灣道係無直接橫越菲林明道嘅路面行人過路設施，而且菲林明道都算係幾闊嘅一條馬路，雙方向仲要係有上落行車天橋嘅車流。
所以話作為行人，呢兩位角色扮演者咁樣衝過菲林明道，其實真係幾危險㗎！不如我哋又睇下第二段片：
嘩！今次真係仆街喇！
好彩當時交通流量低，無其他車即時駛過咋！
其實要安全橫過菲林明道，當然係行連接鷹君中心以及會展廣場嘅行人天橋，如果你話唔想行上行落嘅話，咁都麻煩你喺行人路行遠少少去到會議道或者告士打道嘅過路設施，真係唔好以為自己跑得快就贏到啲車呀！
Be the first to comment