如果你個仔話走去跳海，你會點做？
「梗係報警啦！」
2021年12月23號晚，1位媽媽就面對類似呢種情景，佢喺大約9點報警指自己個10幾歲嘅仔喺尖沙咀海旁跳海自殺。
作為「愛民如子」嘅救援人員，當然立即帶齊工具出動搜救，無幾耐就已經有多架消防車、救護車趕到文化中心廣場，喺確保在場遊人安全下，多架救援車輛更加駛入廣場範圍，方便救援人員沿岸搜索。
而嚟自尖東消防局嘅升降台車就停喺鐘樓對開行車路，車上消防員落車隨即搜索近天星碼頭一帶。
即係咁講，本身消防升降台車所停嘅位置就仲算可以畀巴士駛入尖沙咀碼頭巴士總站——頂多係要挨去右邊「偷位」啫。
是咁的，如果無事無幹就唔會有呢篇啦！
當時喺行車路右邊就有1架電單車，停泊喺「分流人字形標記」上面，電單車尾箱上面仲「揈」咗1個頭盔出嚟。
好快就出事喇！
九巴1架丹尼士三叉戟E500型12米版本雙層巴士（車隊編號：ATENU486，車輛登記：TH9264）就「私牌」入站，準備服務6號路線。
巴士車長要避免轉彎時巴士「擺尾」掃落消防升降台車，唯有儘量挨右「偷位」——不過就正正因為停泊喺「分流人字形標記」上面嘅電單車，停正喺巴士轉彎時嘅「內輪差」範圍，尤其係「揈」咗出嚟嗰個頭盔，咁就會好貼近巴士右邊車身。
作為負責任嘅巴士車長，當然唔會貿然夾硬繼續行車啦！
話晒揩花公司架巴士或者掃冧人哋架電單車都唔好吖嘛！
（不過嗰條教獸好似完全無腦，唔識車輛轉彎唔係得1條線，而係會掃過路面1個一定面積嘅平面範圍）
當巴士車長落車等候進一步指示嗰陣，有路過嘅市民就不值電單車司機亂咁泊車嘅所為，仲即時教導小朋友：
嗱，依家啲人亂咁擺架車車就阻住巴士司機叔叔喇！
就好似你成日玩完玩具都唔執返好、亂咁擺都會阻住人㗎！
擾攘一輪之後，大批原本要入尖沙咀碼頭巴士總站嘅巴士受阻，而電單車司機一直未有現身，尖沙咀碼頭巴士總站嘅站長唯有自己「出手」——自己用手抽起嗰個「揈」咗出嚟嘅頭盔同埋扶住架電單車——咁就勉強夠位畀巴士轉彎入站喇。
不過又咁講，無理由要站長做「站長」就咁企喺度扶住架電單車、抽住個頭盔㗎嘛？所以現場有市民都話既然有咁多警察到場，「警察夾手夾腳抽開成架電單車就得啦！」
結果呢…有1名警員走埋去消防升降台車，搵到消防車司機：
「師兄，後面架巴士（指5A號路線）走咗。
你褪後，讓開個位就得㗎喇！」
如是者，消防升降台車就褪後，讓返多啲位出嚟畀巴士入去巴士總站，至於架電單車就…
無人跟進
Be the first to comment