即係咁講，香港山頂纜車有限公司嘅第5代山頂纜車已經喺2021年6月28號正式退役，連啲車廂都移走埋，以進行最後階段嘅升級工程，迎接萬眾期待嘅全新第6代山頂纜車喺2021年年底投入服務。
所以2021年7月呢個時間，山頂纜車路軌上就無纜車行駛㗎喇！而香港近年盛行「探秘」、「打卡」呢啲風氣，當有條無纜車行嘅纜車軌擺咗喺度，總會引誘一啲人去試吓「探秘」。
2021年7月3號，互聯網上流傳有人報稱沿著山頂纜車路軌踩單車上山，仲要「叻仔」到喺白加道站嘅纜車路軌上面齊齊「打卡」擺上網「曬命」。
不過，大家都明㗎啦，爭取「路權」本身幾合理都好，總會被香港一啲疑似智力有問題嘅「人」搞死。
是咁的，無纜車行纜車軌就唔代表同山頂纜車處所相關嘅法律規定失效嘅，而巴士台嗰邊喺早前有「龍友」擅闖山頂纜車路軌範圍影相嘅時候，都曾經出文講解過…
根據《香港法律》第265B章《山頂纜車附例》第18條「進入處所」嘅規定：-
任何人如非職員，或未經公司妥為授權，不得進入纜車軌道綫或軌道的任何部分，或並非明確提供予乘客使用的處所的其他部分。
嗱，汽車台今次支持有關當局嚴正執法㗎！總之犯法就係唔啱吖嘛！你哋話係咪先？
2 Trackbacks / Pingbacks