加闊享受－600 SGS Royale

講起 Mercedes Benz（平治）嘅豪華改裝，可能大家只會諗起半官方改裝商BINZ改造嘅加長版房車。但其實除咗 BINZ 之外，另一間喺1979-1986年間經營嘅改裝商 Styling Garage Special（SGS）亦都曾經為唔少平治房車進行過各重改裝，除咗加長之外，亦都出現加闊版！今次同大家介紹嘅，就係代號 W126 平治 S-Class 500SEL 嘅加闊版－600 SGS Royale。

喺上世紀80年代，W126可以話係擁有住當時世界上最先進技術、造工質素最高嘅大型豪華轎車。闊 1.82 米，長5.16 米嘅「SEL」版當時已經喺大型豪華轎車中算係大型同寬敞。但係喺80年代嘅奢華消費群並唔滿足於擁有一部普通嘅 S-Class，所以唔同嘅改裝廠就開始著手研究將佢進行變身。

喺1985年，西德嘅 Styling Garage Special 提出咗一個加長車身以外嘅改裝方案，就係「加闊」車身！如果只係將車身加長，相對嚟講就較簡單，只需要劏陣駁長，再豪裝車廂就可以。但係如果要將車身加闊，就連車輛嘅機械部份都需要進行改動。

600 SGS Royale 有「標準版」同「長陣版」兩個唔同軸距。雖然話係「標準版」，但車身長度都比普通嘅 S-Class 500SEL增加咗 30mm，而「長陣版」更加增加咗成 1200mm。而「加闊」嘅車身比普通版有 200mm 嘅增長，達到 2,020mm。

因為加長同加闊咗嘅外形，車身嘅引擎蓋、後排車門、前後擋風玻璃、車頂、頭尾燈組、頭尾泵把，甚至連鬼面罩都要更換或者改造。而機械部份例如：懸掛、傳動、同轉向亦需要重新設計。同時因為加大碼嘅車身令重量大增，原本嘅 5.0 公升 V8 引擎嘅動力已經不敷應用，所以將每個氣缸加大 125cc，令引擎容積加大到 6.0 公升都係必須！