本田（Honda）Stepwgn（ステップワゴン）車系自 1996 年 5 月以「Creative Mover」概念推出第一代版本開始，一直以「讓家族成員的生活更加愉快和繁榮（Make the lives of users more enjoyable and affluent）」為設計宗旨。2021 年係車系推出 25 週年，已經歷四次大轉款嘅第五代 Stepwgn 亦再次嚟到轉款嘅時候。
車廠喺今日（2022年1月7號）就發佈咗第六代 Stepwgn 嘅規格資料同圖片。新一代 Stepwgn 造型上放棄第五代嘅流線型跑感設計，外觀上回歸到第一代、二代明顯嘅兩箱式方正外貌。最大特點係位於車尾，設計方便好用，但天價維修費嘅「WakuWaku Gate」雪櫃門就被取消，車廠改回一般MPV 嘅上掀式大尾門取代。
四四方方嘅車身換嚟嘅好處就係較佳嘅車身尺寸。車廂內嘅座椅排佈亦充分利用內部空間。配有移植自同廠第五代 Odyssey 之Ottoman 腳托嘅中排座椅唔單止可以前後移動，仲可以左右滑動，令各家庭成員喺車上都可以靈活自由咁使用車廂內每一吋空間，其中排左方之座椅更可移動至靠近司機位之位置，即使沒有其他同行成年人陪同下，駕駛者便可在觸手可及之距離照顧同行兒童。全車座椅都經防水同防油處理，並且採用易於清潔嘅「FABTECT」技術。而第三排座椅下就仍然保留過往廣受好評嘅地台下儲物空間。外形方面，大型電鍍鬼面罩當然唔少得，頭燈燈組亦同現行嘅同廠車款 Odyssey 作藍本加以改良，車尾同樣延續第一代嘅直條式尾燈設計，所以就算車身 A 柱、D 柱變得更直，令車身更方方正正都不失霸氣。
動力系統維持使用1.5公升 VTEC 配渦輪增壓直列四缸 DOHC 引擎，最大馬力為150 匹，最大扭力 203Nm，搭配CVT無段變速波箱。而稱為 e:HEV 嘅混合動力版本就使用 2.0L I-VTEC 引擎，配搭兩組電力摩打，綜合馬力 329 匹、綜合扭力 490 Nm。而為咗節省車廂空間，電池、PCU動力控制單元智慧型動力模組就會放喺前排座椅下。
新一代 Stepwgn 分為兩款基礎型號，Air 版本代表明亮嘅房間，使用暖色調內櫳令乘客有置身客廳嘅感覺；而 Spada 版本就採用深色調，令人有時尚嘅印象。同時為咗填補 Odyssey 停產後高檔 MPV 市場之空缺，廠方喺 Spade 版之上再加設為豪華 MPV 市場而設嘅 Spade Premium Line 版本。本田亦喺設計車款時，針對乘客暈車浪進行深度探討同研究，全車採用開放水平同無噪音設計，穩定咗乘客嘅視野，有助於減少暈車浪嘅機會。
車上配備方面除咗喺中控台有 11.4 吋嘅大型屏幕之外，仲可以透過互聯技術車載通信模組「Honda CONNECT」，使用「自動地圖更新服務」，以及「Honda 流動應用程式中心（APP Centre）」嘅各種應用程式去擴展坐車時嘅樂趣和舒適度。喺增加乘坐感外，「Honda CONNECT」同時亦可以為車主提供各種汽車檢測、泊車碰撞偵測、保安警示提示、Find My Car、自定車速警報、地理圍欄警報、遠程遙控汽車等功能，咁就唔怕俾人 Hit & Run 同偷車啦！除此之外，車主可以配合自購嘅數據電話卡同車內提供嘅 Wi-Fi 熱點功能，去為車內乘客嘅流動設備連接上網。同時，Spada 版本嘅波棍將會由類近巴士操控方式嘅「波制」設計，取代傳統波棍。至於本田引以為傲嘅「Honda Sensing」主動式安全設備亦為今代嘅標準配置。
雖然新一代 Stepwgn 無咗雪櫃門，但係喺側門加入咗類似 Odyssey 嘅「指尖輕觸靜電開關」，只需要用手指碰觸，就可控制電動側滑門開關，同時亦於車內B柱位置加設開關門按鈕供後排乘客使用。而「予約ロック」預約鎖定功能，就可以預先設定電動側滑門關閉後，進行車門鎖定，令日常上落車更方便之餘，亦都提高便利性。電動尾門亦都採用咗感應同記憶功能，即使門後有障礙物也會自動感應並自動停止。
今次改款後嘅 Stepwgn 由於要填補 Odyssey 及 Elysion 停產後之大型豪華MPV市場，價錢比舊款估計會比高大約 ¥500,000，但詳細售價要到今年 5 月左右先會正式公佈，因此售價部分目前並沒有公佈。不過加價後就同豐田 Noah / Voxy 同埋日產 Serena 嘅競爭變得冇咁正面，但結果係咁就真係要推出之後由市場嚟決定喇！
下星期（2022年1月14-16日）車廠會於日本（東京）千葉縣幕張メッセ国際展示場舉辦的東京オートサロン2022（TOKYO AUTO SALON 2022）會場內作正式發佈同展覽。
至於幾時會引入香港，除咗要等待代理公佈之外，當然唔更加少得要睇吓運輸署 Type approval 又會搞幾耐啦！
備註：除註明外所有圖片來自本田官方網站
1 Trackback / Pingback