寶馬iX flow 隨意變換黑白車身

過往不時有網上片段展示車身可以隨手機控制而轉換顏色,但往往最後都被人踢爆係電腦CG特效而非真實科技。但喺美國拉斯維加斯舉行嘅電子消費展(CES Show)上,寶馬(BMW)就展出咗一部真係可以改變車身顏色嘅電動車!

呢一部名為寶馬 iX Flow 嘅電動概念車,以類似電子書嘅電子墨水(e-Ink)技術包裹全個車身,車主可以透過連接手提電話應用程式,自行選擇或者按個人情緒甚至天氣,利用車上電子脈衝改變車身顏色。不過因為電子墨水嘅技術所限,目前只可以顯示黑色或者白色。例如喺陽光普照嘅日子,可以將車身變為白色,加速車身散熱;而喺寒冷嘅日子,就可以將車身轉成黑色,以達到令車身較為吸熱嘅效果,從而可以減低車輛喺冷暖氣所消耗嘅能源,繼而加長續航里程。

電子墨水同傳統嘅電子屏幕不同之處,係電子墨水唔會發光,只係靠極少嘅電力刺激電子墨水膠囊將墨水移動去膠囊嘅表面去改變顏色。而呢部 iX Flow 就係世界上第一部「彈指之間」可以更改外觀顏色嘅車。

雖然目前仍然係响概念車階段,未知幾時正式生產採用,不過香港現行法例於車身顏色嘅規定,相信都難以响香港出現。

另外值得一提,呢種變色墨水技術來自台灣造紙業翹楚永豐餘旗下嘅元太科技。足見台灣嘅科技產業水平唔止半導體。

Be the first to comment

Leave a Reply

Your email address will not be published.


*