【綜合外電】豐田封殺塔利班等極端伊斯蘭組織

近週嘅新聞焦點當然係阿富汗，新聞畫面所見嗰班恐怖份子除咗亂噏廿四之外，仲有就係揸住豐田 HILUX 或 LAND CRUISER 農夫車 (Pick-up) 四圍出巡、當作運兵車、坦克車、導彈發射車…… 之類嘅軍用車輛咁用。引得唔少人乘勢抽水「睇吓豐田幾咁無得頂，真係天下無敵」云云，响香港一眾「拜豐田教」信眾可能如痴如醉。

正所謂「非洲式用車」，响阿富汗呢啲不毛之地就是必然；而事實上，HILUX、LAND CRUISER 車系嘅出現，原意就係能夠全天候使用。多樣化車身配搭，既有載客版越野車，又有單排雙排農夫車，加上「齋版」、「豪版」唔同級數設備配搭。只不過當作軍車咁用，又真係使豐田車廠出乎意料之外。

只不過呢啲「民轉軍用」嘅實例，早在廿幾年前塔利班第一次奪權就觸發國際社會關注，歐美等西方列強早就向豐田車廠施壓，要求車廠採取有效措施防止巴勒斯坦哈馬斯、黎巴嫩真主黨、阿富汗塔利班、「伊斯蘭國」之類嘅恐怖主義組織買到 HILUX、LAND CRUISER。但所謂「有生意唔做咩….」即使去到 2015 年美國政府開大火力炮轟豐田車廠，廠方仍然「隻眼開隻眼閉」。

但隨住塔利班成功武裝奪權，加上美、英等多國响阿富汗嘅撤僑行動一遢胡塗，豐田車廠終於要「跪低」。綜合外電報導，豐田車廠日前宣佈實施向塔利班禁售令，禁止全球所有代理商售賣 HILUX 及 LAND CRUISER 予塔利班，及「杜絕」買家轉售予塔利班。

豐田車廠指令全球代理由明年起响銷售 HILUX 及 LAND CRUISER 嘅過程要求買家簽署一份保證書，承諾一年內不會轉售車輛並且期滿後都唔會轉售予塔利班，或明知可能與塔利班有聯繫嘅買家。

表面上好似係一項有效措施，有如向塔利班實施制裁，使得印度、巴基斯坦、阿聯酋、沙地阿拉伯等地嘅豐田經銷商無法再一如既往為塔利班供應「軍備」，但唔好話四個月後先至生效而塔利班仍可以大手掃貨，更是有關嘅措施只適用於經銷商及一手買家，第二任車主仍可以當「白手套」再轉手至塔利班手上。由此可見呢項所謂制裁 Just a show only，得啖笑。

另一方面，尚有其他車廠有類似 HILUX、LAND CRUISER 嘅車款，而對於塔利班呢類「痴線佬」嚟講，就如香港嘅小巴佬一樣「行得就得啦」，話之乜嘢牌子啦。有外國汽車網站直言「咁咪用 Ford Ranger 囉」

又係嘅，所謂「一雞死一雞鳴」，或正如香港人常掛口邊嗰句「有生意唔做咩」「有錢賺唔膁咩」。順便拋吓書包咁講，資助獨裁暴政從來不是新鮮事。响1976-1982年阿根廷軍法統治期間，阿根廷軍政府得到嘅其中一個重要資助來源，就是福特車廠。亦可能咁，就使時任美國總統卡特 (Jimmy Carter) 在1979年國會聽證會回答議員質詢時咁樣回答：

美國有大量企業於阿根廷作巨額投資，期望推動阿根廷經濟可以改善人權問題

更諷刺嘅係，當年有份向 Jimmy Carter 拍枱大罵「助長阿根廷暴政可恥」嘅其中一位議員，就是現任總統 拜登。