考車牌,有冤情?

持有駕駛執照嘅,都經歷過學車、考牌。但相信唔少有真正駕駛經驗嘅人士都會發現,實際揸車的駕駛操控、行車判斷動作 (唔計啲亂嚟嗰啲) 相比學車期間的,完全天淵之別。

先要講嘅唔係車速,事關香港啲車速限制……. (最安全車速係0呀) 就講出路口,學車時,師傅會叫你讓線就踩停架車,再望兩邊;如果係停線,就要拉手制。實際揸車,路口如果無建築物、樹木等遮擋視線,離遠先做一次 Preview,到路口再望多一次,望到「大路」啲車仲有兩枝燈柱以上距離就俾油出,有車嚟緊就梗係踩停。

仲有呢,現實中路口轉彎,唔好話「捽軚」,點都試過「反手軚」(尤其是小巴、巴士、貨車),因為你會發覺「劣豬腸」根本跟唔上架車嘅速度節奏……

相信大家跟住好想問,點解香港嘅牌制度、Marking scheme 會係咁。其實係有得解釋。

前段講「劣豬腸」上架車嘅速度節奏….. 因為好耐好耐好耐以前啲車,除咗性能方面車速無咁快之外,轉向系統無液壓輔助 (即俗稱「風油軚」),攞軚一定要用全身嘅力,尤其是第一吓。「拉軚」由12點至6點,手臂由直到曲,只係用手臂嘅力;但「推軚」用嘅力其實係由背部肌肉開始。

另外,亦因為無「風油軚」,車廠設計轉向系統時軚盤 end-to-end 起碼4.5轉,貨車、巴士起碼6.5轉,藉減少軚盤轉動 vs. 前轆擺動幅度減輕堂軚嘅「重力」。而當其時嘅車嘅加速表現相對今時今日嚟講係好慢,所以嗰陣時嘅車轉彎「劣豬腸」係無問題。但依家所有車都有「風油軚」,車廠設計轉向系統就減少咗 end-to-end 圈數,一般私家車、貨Van 約為 2.5 – 3.5轉,貨車、巴士大約 4.3 – 5.0。該解釋到「劣豬腸」會跟唔上架車嘅速度節奏,一係你要「劣」得好急。

相信大家已經知道同明白,香港嘅駕駛考試評核準則係以接近半世紀之前嘅汽車技術及交通狀況訂立,呢個由「阿Lim」而起嘅講法,並唔係無根據的。

至於出路口、迴旋處嘅評核準則「完全無車」。响幾十年前,香港馬路無咁多車,「大路」或迴旋處當然有可能 All clear 嘅場面啦。今時今日唔係無可能,凌晨2點囉。以我哋所接觸過嘅「新牌仔」,幾乎個個都會出路口時騰晒雞,因為唔識「見到仲有車嚟緊」如何判斷是否夠時間駛出。

呢啲場面,去返考牌嘅場景,可能有啲比較好心機嘅師傅會教導個學生要睇「大路」架車有幾遠先至可以出,但大多數「學神」思考判斷反應慢,可能跟住師傳所教做完判斷夠位到鬆迫力俾油,「大路」架車已經駛至…….. 响考路試時,所謂考試主任就可以俾個「大S」,即使「大路」架車收慢甚至停低。但決定權只係响個所謂考試主任。相信大家已經睇到考試主任嘅問題所在。

又或者有一啲路口嘅設計,例如「大球場」試場加路連山道 / 連道交界,政府為咗討好富貴人家,更改讓線由連道移至加路連山道。任何車輛停在「讓線」之後根本睇唔到有無車由連道落緊嚟,貨Van 一定要有最少1/3車身越過「讓線」先至睇到,私家車更要一半。

好吧,停讓線但睇唔到,就是「58. 未有查看交通情況」,如果剛好有車衝緊落嚟,就是「60. 不讓路給有權先行的車輛」;但要睇到,就要越過讓線 ──「63. 未有遵照警告/提示標誌或道路標記的指示」…… 總之必定可以「肥」一項。但同樣地,決定權只係响個所謂考試主任,仲要係「星斑三味,炒球、蒸頭腩、魚尾煲湯,任君選擇」。

再仲有一些情況,相信大多數要重考嘅人士都經歷過 ── 突然有車從小路駛出,路邊有「死車」而要越過中線…….

所謂考試主任以過時、落伍嘅評核準則去衡量路試考生,再加上幾乎所有路試試場(包括商用車) 都有「肥佬陷阱」;考試進行期間,車上只有考生同那個考試主任,如果遇上突發場面、「擺明整蠱」嘅PK司機,然後唔合格。你想上訴?不錯的,運房局 / 運輸署架構內有一個叫「交通審裁處」嘅東西,但是你有無那個 PK 司機整蠱你嘅證據?

考牌冤案 呢四個字,就係咁樣而嚟。

我哋唔贊成胡亂駕駛,更認為新牌仔切勿在未懂得實際駕駛技術就胡亂「操車」,但香港嘅駕駛考試制度存在極度嚴重問題,學車人士根本沒學習到應該有的基礎駕駛技術,只係跟隨一套接近半世紀以前嘅準則去應付考試;考試主任在沒有任何獨立監察之下操「生死大權」,對於「肥佬陷阱」或可使以有酌情權,但亦可「揸正嚟做」,以便調節合格率於一個可以能撰寫一篇「運輸署嚴格把關駕駛考試」的新聞稿嘅水平。

有冤,該訴,但現實,無法訴。就是我哋開設「考牌冤案錄」嘅其中一個原因。無錯,即使同我哋「訴」完,你都係要再俾 $1058 買路票同續學牌,當然仲要課金俾師傅。但是,當「冤案」堆積如山,運輸署的態度如何無賴,至少仍逃不過輿論壓力。

如果你認為自己係「冤案苦主」,可以透過「考牌冤案」 呈報表格 提交案情俾我哋

我哋收到之後會進行分析,如有需要,會同閣下聯絡。整理後擇個吉日,hide up 所有可能識認身份嘅資料將之公諸於世。

P.S. 之前有網友提供予 Jacky Lim 嘅個案,將陸續刊出。

1 Comment

Leave a Reply

Your email address will not be published.


*