因為新型冠狀病毒（武漢肺炎）全球疫情嚴峻，英國航空一個原本揸開波音747飛機嘅機師無工開，屋企等開飯嘅佢唯有暫時轉份新工——幫連鎖超級市場揸貨車送貨。
英國多間傳媒報導，原本效力英國航空嘅Peter Login，本業係揸飛機去全球唔同地方嘅機師，係唔少人夢想中嘅「專業人士」。不過，新型冠狀病毒（武漢肺炎）大流行搞到全球都停飛大部份航班，Peter仔因而失業…但人總要有啲收入維持生計，佢一於搵過份新工：特易購（TESCO）嘅送貨司機。
Peter仔過去揸開大大架波音747飛機，依家就改揸超級市場嘅平治Sprinter貨車，但無改佢繼續服務公眾――不過就由接載乘客去世界各地，暫時轉為幫英國人運送民生必須品。
因為新型冠狀病毒（武裝肺炎）大流行，英國航空已經停飛倫敦格域機場嘅所有航班，而希思路機場嘅航班亦大幅減少，30000名機艙人員同地勤人員被裁，4000幾名機師要削減50％薪金，仲要喺4月、5月放兩星期無薪假。
對Peter仔嚟講，今次係幾個月以嚟佢第2次失業（T_T）：佢原本喺敦豪做貨機機師，之後轉咗去Thomas Cook揸咗3年幾客機，但2019年9月Thomas Cook倒閉，佢就跳去英國航空繼續揸飛機――但入英國航空做咗4個月之後就遇上疫症導致全球航班停飛而無得開工。
Peter仔隨即向特易購求職，獲聘為送貨司機，當地時間2020年4月4號佢喺推特上發文話：「英國航空波音747嗰抽鑰匙要掛起一段時間…依家人就去到特易購嘅（貨車）駕駛艙。」
由於英國航空嘅服務理念係「To Fly To Serve」，Peter仔開玩笑咁改成「To Drive To Serve」。
對於呢位機師暫時改做司機，網民一片讚揚佢繼續投身前線工作。
Stu Whiteman話：「你嗰種頑強精神、能幹、樂於工作嘅態度會令我哋度過難關…對於其他所有人嚟講，好簡單：一係完成所需嘅關鍵工作去幫助國家，一係留返喺屋企――無其他，二揀一。」
一名叫George嘅網民亦表示多謝Peter仔幫助需要物資嘅人，希望Peter仔可以好快就做返機師，繼續天空上嘅工作。
所以話，職業無分貴賤之餘，就算大家誤以為「貨車佬」只係低學歷、低技術工種，都唔好睇少幫大家送物資嘅「貨車佬」，隨時遇上大家成日講嘅「專業人士」㗎！
順帶一提，Peter仔嘅女朋友原本係Thomas Cook嘅機艙服務員，Thomas Cook執笠之後，佢已經投身國民保健服務部門，同一眾英國國民面對依家呢場疫症。
1 Trackback / Pingback