每當有災害、危難，現代社會有一班受過專業訓練嘅救援人員會儘力搶救，以減少人命同財物損失，而佢嘅其中一個拍檔――消防車――亦會因應時代巨輪向前走而有新發展。
羅臣鮑亞集團早響1866年喺奧地利連茨成立，現時係全球三大消防車同消防設備生產商之一，多年嚟致力為全球消防部隊研發同生產更切合社會發展嘅裝備。
早喺2011年，羅臣鮑亞集團已經諗緊整一款「零現場排放」嘅消防車，以回應多國消防人員對救援現場車輛廢氣排放嘅關注。2016年，當羅臣鮑亞集團慶祝150歲生日，同一年嘅秋天佢哋就開始對外展示佢哋嘅「概念消防車（Concept Fire Truck (CFT)）」諗法，務求令將來嘅消防員可以更好咁應對災害現場。
經過設計、修正，「概念消防車」以電動車型式面世，第一架樣板2018年正式拎去開始試車，其中一個地點就係奧地利紅牛賽道…
全球消防工作唔會係單一氣候環境，所以喺2019年初，佢哋拎咗「概念消防車」去挪威測試冰天雪地環境之下表現係點…
多番測試之後，呢款電動「概念消防車」正式推出市場，率先得到德國柏林同埋荷蘭阿姆斯特丹嘅消防部門青睞，各自購入一架，並會為羅臣鮑亞集團提供意見，聯合進一步改良「概念消防車」。
而喺2019年尾，羅臣鮑亞集團帶咗「概念消防車」去北美展示實力，美國加州州長緊急事件管理辦公室對「概念消防車」亦表示「正評」。
去到2020年2月10號，美國加州洛杉磯消防隊決定斥資120萬美元，購入一架「概念消防車」，將會安排擺去荷里活區嘅82號消防局，成為全球第三個、歐洲以外第一個買家。
洛杉磯消防隊現時有3500名人員，使用1300架各式消防車，分佈喺106間消防局，2019年處理咗4100宗構築物火警…對於羅臣鮑亞集團嘅「概念消防車」，洛杉磯消防隊首長表示係「尖端創新嘅工具，（相比用緊嘅消防車）除咗減低現場噪音、柴油廢氣排放，並且係一套科技先進嘅、靈活嘅滅火救援工具」。
根據羅臣鮑亞集團發佈嘅資料，「概念消防車」配備兩套100千瓦小時嘅電池，足夠支持消防車運作兩句鐘，以洛杉磯消防隊數據，呢個運作時數足夠佢哋應付超過9成嘅緊急召喚。
同柏林、阿姆斯特丹所訂嘅「概念消防車」一樣，洛杉磯消防隊將會喺2020年尾收貨，屆時會為切合美國消防協會同洛杉磯消防隊嘅準則改裝（其中一項係跟返油紅色），務求喺2021年初可以正式為居民服務。（適逢2021年係洛杉磯消防隊「全面以機動車取代消防馬」100週年）
羅臣鮑亞集團估計，去到2030年，全球對於「概念消防車」呢種設計嘅消防車，需求量起碼3200架，而佢哋嘅設計有以下特色：-
- 底盤離地距可以調校：一般行車時為25厘米、遇到行爛路可以升到35厘米、如果水浸仲可以升到48厘米，而現場行動時可以降低到10厘米以便拎車上工具。
- 一鍵操作：座艙入面嘅中央顯示系統可以簡而清咁畀消防員得知消防車機件嘅狀況同埋撳吓個屏幕就可以操作。
- 開會坐法：座艙頭排座位可以旋轉，方便消防員可以喺車廂入面圍埋討論行動對策。
- 組合式結構：車身以一個個區間設計，簡單咁改變底盤同軸距長度就可以因應唔同要求加減內置水缸、泡缸、儲物架，唔同用途都唔需要成架車重新設計過，亦縮短咗訓練所需時數，並且可以容易控制車輛重量分佈。
- 加強閃燈：配備新型發光二極管，比傳統警示燈光20倍，令其他人更容易留意到消防車。
- 無線聯繫：配置Wi-Fi系統，可以加配無人機，以至遙距無線操作車輛裝備。
- 輔助安全系統：設有電子睹後鏡、後視鏡頭、車身電子穩定系統、司機位震動提示系統，方便司機更安全咁揸消防車趕去救人。
- 靈活行動：現時EN1846標準嘅迴旋直徑係17米，「概念消防車」係只需15米，加配尾軸轉向更加可以縮細到12米，而車輛尺寸7600(L) x 2350(W) x 3065(H)毫米，車門用敞門設計，只需要150毫米，方便走入橫街窄巷行動。
- 低路面排放：新式電動機可以比油渣引擎提供更大扭力，車載電池可以使用外來電源充電，要現場充電而為車輛搭載油渣發電機亦只需要用小型油渣房車級數嘅引擎，遠比現時消防車嘅大氣缸油渣引擎減少現場廢氣排放量。
其實香港多年嚟都有使用羅臣鮑亞集團生產嘅消防車輛，未知香港消防處將來又會唔會引入呢款「概念消防車」呢？
1 Trackback / Pingback