2019年對香港嚟講係一個令好多人永遠難以磨滅嘅年份，而2019年10月19號亦係對香港公共交通車輛歷史嘅其中一個重要日子。
1949年10月19號，香港電車車隊中第一架「1949年樣板」戰後式車身電車#120正式投入服務。其後15年，有大約160架戰後式車身電車陸續投入服務，一直服務香港到1986至1992年期間香港電車有限公司為車隊翻新車身。
1980年代嘅嗰一次車身翻新計劃之後，香港電車有限公司喺1991年10月特登利用#86電車嘅零件重修成現時嘅#120電車，儘量保留當時戰後式電車車身嘅特色，一直繼續服務公眾。
適逢2019年10月19號係原本#120號戰後式車身電車投入服務70週年嘅「正日」，一班香港歷史研究者同電車迷舉辦咗一次聚會，共同為戰後式車身電車「賀七十大壽」。
今次聚會係由屈地街電車廠開始，去到跑馬地、銅鑼灣再折返，而且有幸邀請到香港收藏家協會主席張順光、香港資深傳媒工作者鄭明仁等嘉賓，兩位喺行程中仲同各位參加者分享咗香港電車同埋路線周邊嘅歷史。
另外值得一提嘅係今次「賀壽」聚會，每位參加者都會得到一張複製1949年款電車車票，並且即場有香港電車員工跟返當年咁用打窿機幫車票喺上車站打窿，等大家體驗返「有人售票」年代係點樣搭電車。
至於戰後式車身電車70歲嘅大喜日子，當然要整返啲紀念品，今次就有已由香港郵政集郵組蓋銷嘅限量版紀念封喇！
俗語有話「人生七十古來稀」，面對香港政商界近年不斷推倒文物、抽空歷史，今日嘅香港電車#120戰後式車身電車雖然唔係100%原裝，但都不失為香港社會嘅活古董…希望社會各界都能夠以此為榜樣，保育真正嘅香港歷史。
（感謝香港歷史研究組織「原圖有理」協助）
2 Trackbacks / Pingbacks