【車輛講故佬】服務香江七十載 戰後電車風華在

2019年對香港嚟講係一個令好多人永遠難以磨滅嘅年份,而2019年10月19號亦係對香港公共交通車輛歷史嘅其中一個重要日子。

1949年10月19號,香港電車車隊中第一架「1949年樣板」戰後式車身電車#120正式投入服務。其後15年,有大約160架戰後式車身電車陸續投入服務,一直服務香港到1986至1992年期間香港電車有限公司為車隊翻新車身。

1980年代嘅嗰一次車身翻新計劃之後,香港電車有限公司喺1991年10月特登利用#86電車嘅零件重修成現時嘅#120電車,儘量保留當時戰後式電車車身嘅特色,一直繼續服務公眾。

適逢2019年10月19號係原本#120號戰後式車身電車投入服務70週年嘅「正日」,一班香港歷史研究者同電車迷舉辦咗一次聚會,共同為戰後式車身電車「賀七十大壽」。

香港電車員工專誠為戰後式車身電車70大壽做咗塊紀念牌掛喺車頭添㗎!

今次聚會係由屈地街電車廠開始,去到跑馬地、銅鑼灣再折返,而且有幸邀請到香港收藏家協會主席張順光、香港資深傳媒工作者鄭明仁等嘉賓,兩位喺行程中仲同各位參加者分享咗香港電車同埋路線周邊嘅歷史。

面對電車車票打窿機,張順光同鄭明仁兩位前輩都細心研究講解。

另外值得一提嘅係今次「賀壽」聚會,每位參加者都會得到一張複製1949年款電車車票,並且即場有香港電車員工跟返當年咁用打窿機幫車票喺上車站打窿,等大家體驗返「有人售票」年代係點樣搭電車。

至於戰後式車身電車70歲嘅大喜日子,當然要整返啲紀念品,今次就有已由香港郵政集郵組蓋銷嘅限量版紀念封喇!

只係有10套嘅120號電車70週年特別紀念封

俗語有話「人生七十古來稀」,面對香港政商界近年不斷推倒文物、抽空歷史,今日嘅香港電車#120戰後式車身電車雖然唔係100%原裝,但都不失為香港社會嘅活古董…希望社會各界都能夠以此為榜樣,保育真正嘅香港歷史。

(感謝香港歷史研究組織「原圖有理」協助)

2 Trackbacks / Pingbacks

  1. 聖誕送乜未諗好? 遙控電車買返部? - 巴士台 HK Bus Channel
  2. 【香港電車】全球最大車隊獲認證 相關精品要買定? - 巴士台 HK Bus Channel

Leave a Reply

Your email address will not be published.


*