香港電動車充電站起火爆炸 好彩呢次事發地點唔係民居

2024年1月25號2130時，當局接到緊急求助，報稱喺九龍灣臨興街32號美羅中心發生火警，現場仲曾經發生爆炸！

根據流動電話通訊軟件流傳嘅相片可以睇到，呢一次報稱起火爆炸嘅係一個電動車充電站，現場疑似有一架比亞迪電動車正在充電！

另外，有一啲照片亦都可以睇到火警救熄之後，事發時喺充電站充緊電嘅一架比亞迪電動車嚴重燒毀。

至於實際發生火警嘅現場就係美羅中心1期地下7-8室，配合Google Map街景服務嘅資訊，可以睇到呢一個地址屬於一間「Speed+ 快速充電站」。

據資料顯示，呢一個電動車充電站安裝咗四個充電位，利用CCS Combo 2連接器可以提供最高可達 90 kW嘅直流式充電，收費係每分鐘三個半港紙。

呢次起火嘅詳細原因，直至截稿嗰一刻仍然有待消防處公佈，但對於呢一類室內充電設施爆炸起火會對週圍環境嘅安全有幾大威脅，相信近日會備受市民關注，又如果同類事件發生喺人煙稠密嘅住宅屋苑入面…結果會點呢？