講到遠東區搞賽車，大家一定會諗到同香港有一海之隔嘅澳門梳打埠。今年係澳門格蘭披治大賽車70周年，大賽車今年將會由聽日起橫跨兩個週末舉行。
不過我哋今次要講嘅，並唔係澳門大賽車，而係要講喺我哋身處嘅香港，今個週末亦都會有國際賽車比賽喺香港境內進行。2023 年 FIA 世界場地越野車錦標賽喺今個週末，即係11月11、12號，就選擇咗喺中環海濱活動空間，以及龍和道舉行中國香港分站賽事，作為本年度嘅年終賽。
喺活動舉行嘅前一日，中環區進行交通封路措施。今次封路比幾年前舉行電動方程式 Formula-E 嘅時候規模有所縮減，完全封閉嘅道路只係耀星街同埋介乎民耀街至添華道之間一段嘅龍和道。
而網民（SY N Xavier）亦發現，喺活動官方購票網頁上面展示嘅賽道地圖，係會有一段超過一公里龍和路大直路賽段，但係無論係最新嘅賽道安排，又或者實際賽道佈置上，都見到原本又要升街到添華道之間嘅一段龍和道，最終未有納入成為賽道範圍。玩而言之，本身希望睇住電動越野車喺大直路飛馳嘅畫面，將會落空，叫觀眾大失所望。
講到底，香港搞賽車始終同隔離埠有一定距離，只要唔抱有期望，就唔會有好大嘅失望！聽日喺香港同澳門都會同時舉行唔同嘅賽車賽事，作為讀者嘅你，又會選擇睇邊一邊呢？
Be the first to comment