平治輕型貨車Accelo車系　拉丁美洲推Facelift新型號

Mercedes-Benz（平治）嘅輕型貨車底盤車系，香港以致東亞地區嘅車友可能比較陌生。喺2024年度拉丁美洲地區最大嘅貨運展覽「Fenatran」上，平治就展出 2025 年新款 Accelo 輕型及中型貨車系列。Accelo 呢個德國牌子嘅輕型至中型車型家族，上一代車款喺巴西暢銷咗 20 年之後，終於迎嚟一次現代設計嘅外型升級同顯著嘅技術改進。

自推出以嚟，平治 Accelo 喺巴西已經賣出約 10 萬部。而平治更新 Accelo 車系嘅目標係喺拉丁美洲地區嘅輕型貨車市場繼續保持強勢地位，並且擴展呢個系列喺中型貨車市場嘅影響力，尤其係新推出嘅 11 噸級別。

新款嘅 Accelo 分別有 917、1117 同 1417 6×2 三個版本，專為滿足 9 噸、11 噸同 14 噸總嘅重量級別而設計，令載貨能力比舊款提高咗最多 1.2 噸。改進包括引入喺 17 噸 Atego 中重型貨車上使用嘅 OM924 LA 引擎，呢款引擎可以提供 163 匹馬力超過 600Nm 嘅最大扭力。

除咗性能之外，新款 Accelo 嘅外型參照「大哥」－全新 Actros 設計，LED 燈組十分突出，唔單只提升咗辨識度之外，亦提高咗安全性，提供更高嘅照明效率，壽命比鹵素燈膽長 30%，減少咗維修保養成本，為客戶帶嚟更好嘅經濟效益。

而舊款嘅 Accelo 817、1017 同 1317 版本，將會至少繼續喺拉丁美洲市場銷售到2025年，而新款亦都已經喺當地接受訂購，而價錢將會比舊款高約 10%，售價由 R$ 368,533 起。