史上最環保教宗座駕

喺過往嘅《車壇隨手寫》環節，我哋曾經介紹過天主教教宗其中一部教宗座駕－Leyland Constructor Popemobile（https://www.facebook.com/HKCarChannel/posts/625868671213018）。但教宗擁有嘅座駕眾多，有唔少都曝光率低，所以好難一一介紹。而喺上個月，梵蒂岡教廷接收咗一部非常環保嘅燃料電池汽車－豐田嘅 Mirai。

新任教宗一向關注環保議題。為咗令梵蒂岡能達到降低汽車排放、並以再生能源驅動嘅目標，教宗方濟喺2017年已經將佢自己嘅個人代步車由燃油引擎嘅福特 Focus 換成由歐寶（OPEL）捐贈嘅一部Ampera-E電動車。而教宗出巡同外訪用車都續漸循呢個方向發展。

教廷新接收嘅豐田 Mirai 由 Catholic Bishops’ Conference of Japan 所捐贈，係教宗年前訪問日本時所用兩部外訪車輛嘅其中一部。由於新車採用氫燃料電池動力，所以亦係史上最環保嘅教宗坐駕。教宗專用版豐田Mirai 嘅外觀上，B柱之前嘅車身前半部分同普通版 Mirai 完全相同，但B柱之後就進行咗大幅度嘅改裝。後半部分採用開放式設計，方便教宗可以坐或企喺車廂較高位置，方便信眾可以喺教宗外訪或巡遊時，清楚咁覲見聖面。新車亦取消咗車尾箱，改為加設第三排座椅，供隨行人員乘坐。同時為保障教宗同隨行人員嘅安全，後部份車身四周設置咗白色同頂棚圍欄，而車門亦有伸縮樓梯，方便上落。欄杆上面配有LED燈點綴，而經過改裝後車身高度達 2.7 米，長度達 5.1 米。