光岡自動車首款復古SUV上線喇！

光岡自動車（Mitsuoka）一向以現代化汽車為基礎，改裝成為古典外形嘅復古車而聞名。由小型私家車、中大型房車，到超級跑車都有涉獵，但係偏偏就無而家市場最暢銷嘅多用途SUV。不過有消息指，光岡自動車將會喺今個月底推出品牌旗下首款SUV車系，名為Buddy。

Buddy以1980年代美式休閒旅行車為藍本打造，而車身同底盤將會採用豐田第五代RAV4為基礎去改裝。Buddy嘅車頭採用非常有1980年代美國Chevrolet大型旅行車風格嘅電鍍泵把同鬼面罩。引擎倉比原有設計高同厚，所以前輪拱沙板亦都重新設計，而且彷照美式車加設咗通風口造型。

輪圈除咗可以繼續沿用豐田原有設計外，仲可以選擇兩款唔同嘅復古設計，並搭配 BFGoodrich 全地形輪胎。車尾採用彷Cadillac 設計嘅尾燈組，而尾箱車門嘅線條亦重新設計得更有立體感，車牌框移到去電鍍保險桿嘅下方。雖然車身中間部份未有大幅改裝，但車頭車尾嘅造型變化，已經即時令到Buddy充滿古典味。

車廠一共推出兩款動力組合同五個配置版本俾準車主選擇，主要分別係四驅、電子四驅（E-Four ）同前驅，以及車廂同車身裝備上嘅唔同。而動力配置方面，Buddy 沿用豐田RAV4嘅2.0公升汽油及2.5公升Hybrid油電混合動力組合。2.汽油版最大馬力171ps，最大扭力21.1kg-m 峰值扭力；而Hybrid版引擎可輸出最大178ps馬力，2而前後軸兩組摩打就分別可以輸出最大120ps同54ps馬力。