小巴貨車兜頭撞 司機輕傷無大恙

2020年9月30號朝早大約6點10分，九龍大角咀發生1宗車禍，牽涉1架中型貨車以及1架空載嘅專線小巴。

事發位置係大角咀道同惠安街交界嘅路口，設有交通燈作交通管制，車禍後有工程人員到場檢查。

現場消息指當時1架UD中型貨車正由惠安街轉出大角咀道，1架當時無載客、行走九龍專綫小巴12B號路線嘅19座豐田Coaster正沿大角咀道北行，懷疑有司機無跟從交通燈號，兩車喺路口交匯時相撞。

車禍後，小巴車頭睇落損毀唔輕，小巴司機報稱輕傷，由救護車送去醫院治理。

至於貨車，相撞後橫掃過路處安全島，掃毀兩側鐵欄先至停低，據悉正值破曉，未到學生趕返學嘅時間，途人稀少，安全島當時無人等候過路，否則可能會造成多人死傷。

由於兩車阻礙現場過路處，途人需要走出馬路交界中心過路，所幸當時交通流量仍然偏低，未致險像橫生。

事發後，貨車漏出機油，警員需要喺路面鋪上木糠，而萬安街同大角咀道之間一段惠安街，以及大角咀道雙方向近路中心嘅1條行車線一度需要封閉。

稍後兩車由拖車拖走，警方亦正調查車禍正式起因。