呢部貌似福特Mustang嘅係……

今朝，喺我哋 Facebook 同大家介紹過一部裝咗轉子引擎，行 Hybrid 嘅 Tesla Model S。今晚，就再等我哋同大家講下另一部 Tesla Model S 改裝車。唔講咁多，去相先！

係呀，你無睇錯，我哋都無upload錯，呢部的確係一部Model S！嚟自俄羅斯嘅改裝商Aviar Motors早排發佈咗旗下全新嘅改裝概念車型——Aviar R67。呢部車擁有貌似1962年款福特Mustang嘅外形，但底盤同動力系統就係來自Tesla Model S。廠方表示，Aviar R67 嘅續航里程可以達到507公里。

Aviar R67高度復原咗1962年款福特Mustang嘅整體造型，包括經典嘅車頭圓燈同充滿肌肉感嘅後沙板。不過車燈亦都與時並進，改用LED燈組，而車身前後同左右裙腳，都有碳纖維擾流板。

Aviar R67嘅內飾亦都忠於福特Mustang嘅設計，中控台採用左右對稱設計，空調出風口使用復古嘅圓形做基礎。而儀錶板就沿用Tesla Model S嘅大尺寸全液晶顯示屏。

由於Aviar R67基於Tesla Model S改裝，因此依然採用相同嘅雙摩打配置，摩打最大功率可達618千瓦，而最高時速就有250km/h。受惠於較輕量化嘅車身，0-100km/h加速只需2.2秒，但續航里程就因為風阻系數低於原本 Tesla Model S，而稍降至507公里。