2020年3月11號朝早10點鐘左右，臺灣桃園市楊梅區中山北路一段，又有人揸住私家車搵裝甲車「挑機」！
今次主角係1架豐田Camry房車，男司機姓吳，當時沿中山北路一段內側車道向楊梅交流道方向行。
事發前喺房車前面有1架行緊同一方向嘅國軍雲豹裝甲車，房車司機可能嫌裝甲車阻住自己，抽頭想過架裝甲車…結果…
切線去裝甲車車頭嗰陣，雙方距離太近，裝甲車司機煞唔切掣，裝甲車擦撞埋房車右邊車身。
擦撞之後，房車右邊車身有多處大面積凹痕，右後車門陷入車廂，玻璃亦碎裂，要醫返都應該幾貴…
至於嗰架國軍雲豹裝甲車，睇落無損毀咁…
今次好彩無人傷亡受困，當地警方到場對雙方司機都做咗酒精測試，雙方數值都係0，而肇事原因仍然有待進一步釐清。
雖則有曰「豐田無得頂」，但對住真．裝甲車就咪拎自己嚟「校飛」喇！
Be the first to comment